Kommertsııalyq emes uıymdar respýblıkalyq bıýdjetke monıtorıng júrgizedi

NUR-SULTAN. QazAqparat – Kommertsııalyq emes uıymdar respýblıkalyq bıýdjettiń jartysyna qoǵamdyq monıtorıng júrgizýdi josparlap otyr. Bul týraly QR Sybaılas jemqorlyqqa qarsy qyzmettiń áleýmettik jelidegi paraqshasynda bergen suhbatynda «INTEGRITY ASTANA» kommertsııalyq emes uıymynyń dırektory Janat Nurǵalıev málim etti, dep habarlaıdy QazAqparat tilshisi.

«Qazirgi kezde Úkimet tarapynan daǵdarysqa qarsy sharalarǵa qomaqty qarjy bólinip jatyr. Tek Eńbek jáne halyqty áleýmettik qorǵaý mınıstrligi boıynsha eleýli qarjy qarastyrylǵan. Respýblıkalyq bıýdjet 13,8 trln teńge shamasynda. Densaýlyq saqtaý mınıstrligine 1,5 trln teńge tıesili. Sondyqtan joba aıasynda tórt mınıstrlik boıynsha qoǵamdyq monıtorıngige bastamashylyq jasaýǵa nıettimiz. Bul óz kezeginde respýblıkalyq bıýdjettiń jartysyn qamtıdy. Osy oraıda Eńbek jáne halyqty áleýmettik qorǵaý, Densaýlyq saqtaý, Aýyl sharýashylyǵy, Saýda jáne ıntegratsııa mınıstrlikteri eskerilgen. Nege biz osy mınıstrlikterdi aldyq? Búginde Úkimettiń daǵdarysqa qarsy sharalary aıasynda olar negizgi vedomstvolar bolyp tur», - dedi J. Nurǵalıev.

Onyń sózine qaraǵanda, atalǵan mınıstrlikterdiń bıýdjetteri týraly málimet qoǵamǵa túsinikti túrde jetkiziledi, bul turǵyda el halqy qarjynyń ıgerilýi barysynan habardar bolady. «INTEGRITY ASTANA» bul jumysta memlekettik organdarǵa járdemdesedi.

Janat Nurǵalıevtiń atap ótýinshe, tórt mınıstrliktiń bıýdjetterin monıtorıngileý mamyr aıynan bastalyp, bul joba jarty jyl boıy júzege asyrylady. Jobaǵa táýelsiz sarapshylar qatysady. Bıýdjetke taldaý jasalyp, qarjynyń tıimdi ıgerilýi baǵalanady.