Kommertsııalandyrylǵan ǵylymı jobalardyń úlesi artady

NUR-SULTAN. QazAqparat – Kommertsııalandyrylǵan ǵylymı jobalardyń úlesi artady. Bul týraly Úkimet otyrysynda tehnologııalyq serpilis ulttyq jobasyn talqylaý kezinde QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat.

«Ulttyq joba aıasynda ǵylymnyń eldi damytýǵa qosqan úlesin arttyrý maqsatynda ǵylymdy, óndiristi jáne bıznesti ıntegratsııalaý boıynsha jumystar bastaldy. Qazirgi kezde kásipkerlik sektordyń zertteýge arnalǵan shyǵystarynyń úlesin shyǵyndardyń jalpy kóleminen 50 % deıin jáne kommertsııalandyrylǵan jobalardyń úlesin 30 paıyzǵa deıin arttyrý josparlanǵan. Sondaı-aq ǵylymı-zertteý jobalarynyń aıasynda patenttik belsendiliktiń 30 % ósýin qamtamasyz etýge tyrysamyz», - dedi S. Nurbek.

Onyń aıtýynsha, búgingi tańda «Ǵylym qory» AQ jelisi boıynsha barlyǵy 129 joba kommertsııalandyrylyp jatyr. 2022 jyly kommertsııalandyrý boıynsha jańa konkýrs jarııalandy. Onyń úlesi 26,2 % qurady.

2021 jyly salalardyń strategııalyq ǵylymı-tehnıkalyq mindetterin sheshý boıynsha ǵylymı-tehnıkalyq baǵdarlamalardy baǵdarlamalyq-nysanaly qarjylandyrýǵa 2 konkýrs, sondaı-aq granttyq qarjylandyrýǵa 5 konkýrs ótkizildi.

«Tutastaı alǵanda, «Ǵylym» blogy boıynsha Ulttyq jobany iske asyrý ǵalymdar men zertteýshiler sanyn 34 myń adamǵa deıin (2021 jyly – 21,6 myń adam) ulǵaıtý esebinen jáne jobalardy jeke qosa qarjylandyrý úlesin 50 % deıin (2021 jyly-20%) jetkizý arqyly ǵylymnyń eldiń damýyna qosqan úlesiniń ósýin arttyrýǵa múmkindik beredi. «Ǵylym» blogyn qarjylandyrý boıynsha mynany atap ótkim keledi. Ulttyq joba boıynsha jalpy josparly qarjylandyrý 832,9 mlrd teńgege jetedi», - dedi mınıstr.

Foto: appau.org.ua