Komıtet Qyzylorda-Jezqazǵan jolyndaǵy qurylys jumystaryna túsinik berdi

ASTANA. QazAqparat – Ulytaý oblysy boıynsha jol ýchaskelerinde merdigerlik uıymdardy anyqtaý boıynsha konkýrstyq rásimder júrgizilip jatyr. Bul týraly Indýstrııa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov málim etti, dep habarlaıdy QazAqparat tilshisi.

«Qyzylorda-Jezqazǵan» avtojolyn qaıta jańartý jobasy eki negizgi bólikten turady. Uzyndyǵy 218 shaqyrym bolatyn Qyzylorda oblysynyń aýmaǵy boıynsha ótetin ýchaskede qurylys-montajdaý jumystary 2022 jyly bastalǵan», - dedi Amangeldi Bekov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, atalǵan ýchaskelerde qurylys jumystaryn bes merdiger uıym atqaryp jatyr. Jalpy, qazirgi kezde tegisteý, joldyń negiz qabattaryn salý sııaqty jumystar atqaryldy. Osy ýchaskelerdegi jumystardy aıaqtaý 2024 jylǵa josparlanǵan.

«Sonymen qatar, Ulytaý oblysy boıynsha jol ýchaskelerinde merdigerlik uıymdardy anyqtaý boıynsha konkýrstyq rásimder júrgizilip jatyr. Bıyl ekinshi jartyjyldyqta merdiger uıymdar belgili bolady. Osy oraıda joldaǵy qurlys jumystary bastalady», - dedi komıtet ókili.

Budan buryn habarlanǵandaı, 2023 jyldyń qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 92 paıyzǵa jáne jergilikti jeli boıynsha 87 paıyzǵa deıin jetkizilmek.

Jyl aıaǵyna deıin «Ortalyq – Ońtústik» dálizi boıynsha jol ýchaskeleri ashylady.