Komıssııa: Bek Air-diń taǵy birneshe ushaǵy muzǵa qarsy arnaıy suıyqtyqpen óńdelmegen

NUR-SULTAN. QazAqparat – QR Premer-Mınıstriniń orynbasary Roman Sklıar 27 jeltoqsanda apatqa ushyraǵan áýe kemesimen bólek, Bek Air-diń taǵy birneshe ushaǵy arnaıy suıyqtyqpen óńdelmegenin málim etti, dep habarlaıdy QazAqparat tilshisi.

«27 jeltoqsanda saǵat 00.01-den 07.00-ge deıin Almaty áýejaıynda bes áýe kemesi óńdelip, taǵy beseýi óńdelmegen (muzdyń qatýyna qarsy suıyqtyqpen)», - dedi Roman Sklıar OKQ-da ótken baspasóz máslıhatynda.

Sonymen qatar, onyń aıtýynsha, 27 jeltoqsanda Almaty-Atyraý baǵdary boıynsha saǵat tańǵy 05.30-da ushyp shyqqan «Bek Air» áýe kompanııasynyń ushaǵy da muzdyń qatýyna qarsy suıyqtyqpen óńdelmegen. Komıssııa bul máseleni nazarǵa almaq.

Eske sala ketsek, buǵan deıin QR Premer-Mınıstriniń orynbasary Roman Sklıar BekAir ushaǵynyń apatqa ushyraý sebebiniń basty nusqasyn ataǵan bolatyn.

«Áýe kemesin muzdyń basýyna qarsy suıyqtyqpen óńdeý jumysy ishinara júrgizilgen. Áýe kemesi komandıriniń sheshimi boıynsha, tek stabılızatordy óńdeý týraly sheshim qabyldanǵan. Birinshi sanattaǵy muzdyń basýyna qarsy suıyqtyqpen ushaq qanattary da óńdelý tıis», - dedi Roman Sklıar.

Eske sala ketsek, 2019 jyldyń 27 jeltoqsanynda Almatydan Nur-Sultan qalasyna ushyp shyqqan Bekeır kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy. QR Premer-Mınıstri Asqar Mamınniń tóraǵalyǵymen ushaq apatynyń sebepterin tergeý boıynsha Úkimettik komıssııanyń otyrysy ótkizilgen edi. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa jiberildi.