Kómirqyshqyl gazy shyǵaryndysy boıynsha Qazaqstan álemde 20-orynda

NUR-SULTAN. QazAqparat – Elimizdiń energetıka salasynyń tujyrymdamasyna sáıkes 2035 jylǵa qaraı 5 GVt-tan joǵary elektr energııasy jańartylatyn energııa kózderi esebinen óndirilmek. Bul týraly QR Ekologııa, geologııa jáne tabıǵı resýrstar mınıstrligi klımattyq saıasat jáne jasyl tehnologııalar departamentiniń dırektory Oljas Aǵabekov málim etti, dep habarlaıdy QazAqparat tilshisi.

«Dekarbonızatsııa trendteri ózekti. Búginde ınvestıtsııalyq qorlar men iri qarjy ınstıtýttarynyń kópshiligi jasyl tehnologııaǵa kóship, otyn, kómir qazba túrlerimen baılanysty jobalardan tolyq bas tartty. Qazirgi ýaqytta 130-dan astam el kómirtekti beıtaraptyqqa qol jetkizý maqsatyn jarııa etti. Álemdegi zııandy shyǵaryndylardyń 80% energııa óndirýmen baılanysty. Atalǵan sala klımattyń ózgerýine teris áserin tıgizedi»,- dedi Oljas Aǵabekov elordada ótip jatqan HІІ halyqaralyq taý-ken metallýrgııa kongresi barysynda.

Sondaı-aq atalǵan shara barysynda kómirtekti retteý, Qazaqstannyń energııa júıesin transformatsııalaý máselesi de talqylandy.

«Qazaqstan kómirqyshqyl gazynyń shyǵaryndylary boıynsha 221 eldiń ishinde 20-orynda, al jan basyna shaqqanda 10-orynda. 2020 jyly parnıktik gazdar shyǵaryndylary 351 mln tonna SO2 (kómirqyshqyl gazy) ekvıvalentin qurady. Alǵa qoıǵan maqsatqa saı biz 2030 jylǵa qaraı kómirqyshqyl gazynyń shyǵaryndylaryn 324 mln tonnaǵa deıin azaıtý qajetpiz. Qazaqstannyń dekarbonızatsııa trendine qosylý jospary baryn eskerý kerek. Odan bólek, Memleket basshysy 2060 jylǵa qaraı kómirtegi beıtaraptyǵyna qol jetkizý týraly málimdedi», - deıdi ol.

Spıkerdiń málimetinshe, energetıka salasynyń tujyrymdamasyna sáıkes 2035 jylǵa qaraı elimizde 5 GVt-tan astam elektr energııasy jańartylatyn energııa kózderi esebinen óndiriledi.

«Bul parnıktik gaz shyǵaryndylaryn azaıtý, aýystyrý jáne qazba otynyna baılanysty generatsııany birtindep almastyrý úshin mańyzdy qural. Biz parnıktik gaz shyǵaryndylaryn memlekettik retteý júıesimen saýda júıesin ıntegratsııalaýǵa kirisýdi jáne eýropalyq júıege saı ıntegratsııalaýdy josparlap otyrmyz. 2026 jyldan bastap Eýrokomıssııanyń usynysyna sáıkes parnıktik gaz shyǵaryndylary úshin tólem alynatyn bolady», - dep tolyqtyrdy O. Aǵabekov.

Buǵan deıin Kazakhmys korporatsııasynyń Jezqazǵandaǵy quıý-mehanıkalyq zaýytyn jańǵyrtýǵa 10 mln dollar baǵyttaıtyny týraly habarlaǵan edik.

Aıta ketsek, elordada HІІ halyqaralyq taý-ken metallýrgııa kongresi ótip jatyr.