Kómir tasymalyn baqylaıtyn monıtorıngilik top quryldy

NUR-SULTAN. QazAqparat – Qazaqstanda jylytý maýsymynyń bastalýyna baılanysty kómir tasymaldaý barysyn qadaǵalaıtyn arnaıy monıtorıngilik top qurylyp, jedel shtab jumysyn bastap ketti, dep habarlaıdy QazAqparat tilshisi.

«Jylytý maýsymy qarsańynda dástúr boıynsha «Qazaqstan temir joly» UK» AQ ortalyq apparatynda kómir tasymaldaý jónindegi jedel shtab pen jol bólimshelerinde jedel toptar jumysyn qaıta jandandyrdy. Apta saıyn kómir tasymaldaýshy mekeme ókilderiniń qatysýymen shtab otyrysy ótkiziledi. Onda kómir tasymaldaý máseleleri qaralady, júk vagondarynyń keshigý sebebi anyqtalyp, ol boıynsha shuǵyl sheshimder qabyldanady. Sonymen qatar, bıyl temir jol bólimshelerinde monıtorıngilik toptar quryldy. Top músheleri jalpy elimiz boıynsha kómir tıeý men jetkizýge qatysty aqparat jınap, suryptaýmen aınalysady. Problema týyndaǵan jaǵdaıda onyń saldaryn anyqtap, sheshim qarastyrady», - dedi «QTJ «Júk tasymaly» JShS bas dırektorynyń orynbasary Qanat Kóbesov «Samuryq-Qazyna» AQ alańynda onlaın ótken baspasóz máslıhatynda.

Onyń aıtýynsha, kómir tasymaly jumysyna qatysty qurylǵan jedel shtab táýlik boıy jumys isteıdi.

Buǵan deıin elimizdiń keıbir aımaqtaryna kómir jetkizýdiń keshigý sebebi belgili boldy.

Sondaı-aq, Q. Kóbesov bıyl elimiz TMD elderine 2,7 mln tonna kómir eksporttaǵanyn málim etti.