Kómir tapshylyǵynan Túrkistan oblysynda jylyjaıdaǵy ónimder úsip jatyr
Túrkistan oblysynda jylyjaı ıeleri pisip úlgermegen ónimin qoqysqa tastaýǵa májbúr. Sebebi, sharýalar kún sýyǵanda kómirdiń joqtyǵynan jylyjaılaryn jylyta almaǵan. Bul týraly kásip ıeleri áleýmettik jelide taraǵan vıdeolarda da aıtyp, qynjylys bildirýde.
Máselen, Saıram aýdanyndaǵy «NurAgro» sharýa qojalyǵynda 150 tonna qyzanaq berer egin jaramsyz bolyp qalǵan. Iesi Nurjan Sadýaqasov quzyrly organdardan arnaıy komıssııanyń kelýin kútip otyr. Sonan soń, búlingen egindi jınap, malǵa bermek.
Bul jaǵdaıǵa qatysty túsinik bergen Túrkistan oblysy ákimdiginiń baspasóz qyzmeti jylyjaı ıelerine qoldaý kórsetiletinin jetkizdi.
«Bıyl qańtar aıynda aýa raıy -22 gradýsqa deıin kúrt sýyp, qar qalyń tústi. Jeke jylyjaı sharýashylyqtary tıisti kómir qoryn qalyptastyrmaǵandyqtan qys mezgiline daıyn bolmaı shyqty. Oblys ákiminiń tapsyrmasyna sáıkes shuǵyl is-sharalar atqarylyp, 591,0 gektar (1058 agroqurylym) jylyjaılarǵa qysta 200,8 myń tonna kómir otyny qajettigi anyqtaldy. «Qazaqstan temir joly» AQ arqyly 186,7 myń tonna kómir oblysqa jetkizildi» - delingen aqparatta.
Ákimdik málimetine súıensek, jylyjaılardyń 94% qoldan jasalǵan jeńil konstrýktsııaly bolǵandyqtan, ónimderi úsip ketken. Onyń ishinde 167 taýar óndirýshiniń 36 gektar jylyjaıy qar salmaǵyn kótere almaı jaramsyz kúıge túsken. Osylaısha, jeke kásipkerler shyǵynǵa ushyrady.
«Ákimdik tarapynan taýar óndirýshilerdiń múlkine keltirilgen nuqsan jóninde akti usynylǵan jaǵdaıda qarjy uıymdary aldyndaǵy bereshegin (nesıe) óteý merzimin 1 jylǵa keıinge shegerý jóninde usynys joldanady. Sondaı-aq zardap shekken jylyjaı ıelerin qarjy uıymdary arqyly jeńildetilgen nesıemen qamtamasyz etý jumystary atqarylady» - delingen Túrkistan oblysy ákimdiginiń baspasóz qyzmeti taratqan málimette.
Aıta keteıik, budan buryn Túrkistan oblysynda kómirge suranys kúrt artqanyn jazǵan bolatynbyz. Basty sebep – oblysta jylyjaılardyń kóbeıýi. Sondyqtan, kásipkerlik baǵyttaǵy nysandardy kómirmen qamtamasyz etý máselesi kún tártibinde tur. Sonymen qatar kúnniń kúrt sýytýy da kómirge suranysty joǵarylatqan.