Kómir satatyndar elektrondy shot-faktýra shyǵarýǵa mindetteledi
«Memlekettik kirister komıteti kómir baǵasynyń negizsiz ósýine qarsy kúres boıynsha jumys júrgizedi. Kómirdi ken ornynda tikeleı satqandaǵy quny men tutynýshyǵa jetken baǵany salystyrǵanda, ıaǵnı temirjol tarıfterin esepke alǵannyń ózinde, kómirdiń bastapqy baǵasy eleýli túrde tómen ekenin bilemiz. Sondyqtan búginde otyn baǵasy memleket tarapynan rettelmegen bolsa da, negizinde onyń quny ortadaǵy alypsatarlar saldarynan qalyptasqan. Al keıbir jaǵdaılarda baǵanyń aldyn ala kelisimi bolýy múmkin. Osyǵan baılanysty kómir shyǵyratyn ken ornynan bastap, ony sońǵy paıdalanýshyǵa deıin qamtıtyn búkil protsesti qadaǵalaıtyn tetikti qurýdy josparlap otyrmyz», - dep toqtaldy Memlekettik kirister komıteti Mamandandyrylǵan basqarmasynyń bas sarapshysy Darhan Ábdiqadirov.
Onyń sózine qaraǵanda, osy maqsatta kelesi jyly kómirdi satatyn barlyq salyq tóleýshiler QQS-ty tóleýshi retinde tirkelýine qaramastan, elektrondy túrde shot-faktýra shyǵarýǵa mindetteledi. Sonymen qatar, bul mindetterdi zańnamalyq turǵyda bekitý eskerilgen.
«Osy qajetti sharalar iske asyrylǵannan keıin, biz kómirdiń ken ornynan peshke deıingi búkil qozǵalys baǵdaryn, sondaı-aq otynnyń baǵa qurylymyna qatysty tolyq tizbegin kóremiz», - dep túsindirdi bas sarapshy.
Bul turǵyda Darhan Ábdiqadirov elektrondy shot-faktýralardy engizý sharalary alypsatarlar tizbegin shekteıtinin atap ótti.
Budan buryn habarlanǵandaı, QR Qarjy mınıstrliginiń Memlekettik kirister komıteti «Vırtýaldy qoıma» modýli Aqparattyq júıesin iske qosady.
ıAǵnı 2019 jyldan bastap kómirdi satý «Vırtýaldy qoıma» modýli arqyly júzege asyrylatyn bolady. Vedomstvodan málim etkendeı, onlaın-qoıma salyq tóleýshiniń qoımasynda qansha kómir qalǵanyn kórýge, sondaı-aq óndirýshiden (jerqoınaýyn paıdalanýshy) sońǵy tutynýshyǵa deıin otynnyń jyljý tizbegin baqylap otyrýǵa múmkindik beredi.