Kómir óndiretin óńirlerde tyń jobalar iske qosylýy múmkin

ASTANA. QazAqparat - QR Energetıka mınıstrliginiń paıymynsha, elde kómir óndirý kóleminiń tómendeýi turǵysynda kómirli óńirlerdi damytý sharalaryn kúsheıtý qajet, dep habarlaıdy QazAqparat.

«Monoqalalardy, onyń ishinde tek kómir óndirisimen aınalysatyn qalalardy turaqty damytý maqsatynda jergilikti atqarý organdary jańa óndiristerdi qurýǵa, kadrlardy qaıta oqytý, ınfraqurylymdyq jobalardy damytýǵa negizdelgen ekonomıkany ártaraptandyrý jumystaryn kúsheıtýi tıis»,-dedi QR Energetıka mınıstri Qanat Bozymbaev Úkimet otyrysynda.

Osy oraıda ol Ekibastuz qalasyn mysal retinde keltirdi. Bul qalada temir jol mashına qurylysy boıynsha birqatar jobalar iske asyrylǵan, sonymen qatar energetıkalyq mashına qurylysy baǵytynda óndirister salyndy. Budan bólek, qurylys ındýstrııasy men jylyjaı sharýashylyqtary damyp keledi.

Degenmen de, mınıstrlik birneshe baǵdarlamalardy keńeıtý jolymen elimizde kómir óndirý deńgeıin qoldaý men saqtaý boıynsha jumystardy kúsheıtý kerektigin alǵa tartty. Onyń ishinde keshendi túrde kómirdi tereńdetip óńdeý aıasynda kómirden dızel otynyn jáne basqa da sıntetıkalyq ónimderdi shyǵarý eskerilmek.

«Sonymen qatar búginde shahtalyq metandy elektr energııasyn óndirýge paıdalaný baǵytynda jumystar atqarylýda. Bul óz kezeginde parnıktik gazdarmen lastanýdy aıtarlyqtaı tómendetedi. Osy oraıda Qaraǵandy oblysyn gazben qamtamasyz etý maqsatynda metandyq-kómir qabattaryn barlaý men óndirýdi eskerip otyrmyn», - dedi mınıstr.