Kómir munaı men gaz salasyna salmaqty báseke bola alady - V. Shkolnık

ASTANA. QazAqparat - Kómir munaı men gaz salasyna salmaqty báseke bola alady. Búgin «Nur Otan» partııasynyń Májilistegi fraktsııasy janyndaǵy Ekonomıkalyq saıasat keńesiniń otyrysynda Energetıka mınıstri Vladımır Shkolnık osylaı málim etti. Eske salaıyq, keńeste «Nur Otan» partııasy Saılaýaldy tuǵyrnamasynyń «Innovatsııalyq ekonomıka» baǵyty boıynsha máseleler talqylanǵan edi.

Mınıstrdiń aıtýyna qaraǵanda, kómir salasyn ınnovatsııalyq damytýdaǵy basym baǵyttardyń biri - tereń óńdeý.

«Búgingi kúni osy segment elimizdegi elektr energııasyn óndirýdiń 74 paıyzyn qurap otyr. Kómir - hımııalyq ónerkásiptegi 100 paıyzdyq júktemeni atqaryp, halyqtyń kommýnaldyq-turmystyq otynǵa suranysyn da tolyǵymen qanaǵattandyrady. Respýblıkamyzdaǵy óndiriletin kómirdiń 30 paıyzy eksportqa shyǵarylady», - dedi V. Shkolnık.

Mınıstrdiń aıtýynsha, elimizdegi geologııalyq kómir qory 300 mlrd. tonna, al barlanǵan kómir qory 304 mlrd. tonnany quraıdy.

«Bul - keremet áleýet. Munaıshylarǵa aıtqym keledi, kómir munaı men gaz sektoryna aıtarlyqtaı salmaqty báseke bola alady. Búgingi tańda kómirdi hımııalyq óńdeý salasynda jańa tehnologııalar paıdalanyla bastady. Qazirdiń ózinde tonna-tonna kómirlerden 600-700 lıtr bolatyndaı sıntetıkalyq munaı óndiretin zaýyttar shyǵyp jatyr. Al bul úderiske salynǵan ınvestıtsııanyń qaıtarymy 2-4 jyldyń shamasynda. Men sizderge aıtaıyn, tek Torǵaı basseıininde 600 mlrd. tonna kómir jatqan bolsa, ony keleshekte tereńirek óńdeýge qol jetkizsek, ıaǵnı sıntetıkalyq munaı alsaq, ony birneshe Qashaǵanmen salystyrýǵa bolatyn edi», - dedi V. Shkolnık.

Onyń aıtýynsha, bul máselemen Energetıka mınıstrligi túbegeıli aınalysyp jatyr. «Bul - bizdiń elimiz úshin munaı men gaz salasy sekildi perspektıvaly sala», - dedi ol.