Kómir baǵasynyń negizsiz ósýin boldyrmaýdy qazirden oılastyrý kerek – Álıhan Smaıylov

NUR-SULTAN. QazAqparat – QR Premer-Mınıstri Álıhan Smaıylov Úkimet otyrysynda kómir baǵasynyń negizsiz ósimine jol bermeý máselesinde halyqqa túsindirý jumystarynyń ózekti ekenin eske saldy, dep habarlaıdy QazAqparat tilshisi.

«Byltyr qyrkúıek aıynda Shyǵys Qazaqstan, Soltústik Qazaqstan, Pavlodar jáne Qostanaı oblystarynda kúnniń erte sýytýyna baılanysty, kómir satyp alýǵa úlken kezekter paıda bolǵanyn kórdik. Alypsatarlar osy jaǵdaıdy paıdalanyp, kómir baǵasyn kúrt kóterip jiberdi. Bul halyq arasynda narazylyq týdyrdy. Indýstrııa mınıstrligi ákimdiktermen birlesip, turǵyndardy jáne jylý elektr ortalyqtary men qazandyqtardy qajetti kólemdegi kómirmen aldyn ala qamtamasyz etý jumystaryn uıymdastyrsyn», - dedi Álıhan Smaıylov.

Sondaı-aq ol jergilikti jerlerde halyqqa kómir satý máseleleri boıynsha aqparattyq-túsindirý jumystaryn ýaqtyly júrgizýdi tapsyrdy.

«Qazaqstan temir joly» kompanııasy elektr stantsııalaryna kómir jetkizýge basymdyq bere otyryp, olardy qajetti vagondarmen qamtamasyz etsin. Básekelestikti qorǵaý jáne damytý agenttigi ákimdiktermen birlesip, kómir baǵasyn erekshe baqylaýǵa alyp, ásirese turǵyndar úshin kómir baǵasynyń negizsiz ósýine jol bermeý sharalaryn qabyldaýy qajet. Jalpy Energetıka jáne Indýstrııa mınıstrlikterine nysandardy aldaǵy jylytý maýsymyna daıyndaý barysyna qatań monıtorıng júrgizýdi tapsyramyn», - dedi Úkimet basshysy.

Aıta keteıik, ótken aıda Memlekettik kirister komıteti áleýmettik mańyzy bar azyq-túlik taýarlary jáne tas kómirdi baqylaıtyn pılottyq jobany iske qosqanyn habarlaǵna edi.