Kómir baǵasy ósken joq – QR IIDM

ASTANA. QazAqparat – Razrezderdegi kómirdiń quny quny ózgergen joq. Bul týraly QR Indýstrııa jáne ınfraqurylymdyq damý mınıstrliginde vedomstvo basshysy Qaıyrbek Óskenbaevtyń tóraǵalyǵymen halyqty jáne kommýnaldyq-turmystyq sektordy kómirmen qamtamasyz etý máseleleri boıynsha ótken keńes barysynda málim boldy, dep habarlaıdy QazAqparat.

Mınıstrliktiń basapasóz qyzmetiniń habarlaýynsha, atalǵan másele mınıstrliktiń erekshe baqylaýynda.

Búgingi tańda Halyk Market platformasyna óńirlik operatorlardy qosý jumystary jalǵasýda. Qazir 428 óńirlik operatordyń tek ekeýi ǵana osy platforma arqyly kómirdi áleýmettik baǵamen saýdalaıdy.

Atap aıtqanda, Qostanaı oblysy men Almaty qalasynda ornalasqan operatorlar. Endigi kezekte platformaǵa qosylý úshin Soltústik Qazaqstan, Qyzylorda, Pavlodar, Qaraǵandy jáne Jambyl oblystary tarapynan ótinimder kelip túsken.

«Jergilikti atqarýshy organdar Halyk Market qosymshasyna óńirlik operatorlardy qosý boıynsha jumysty kúsheıtip, bul úrdisti tsıfrlyq formatqa aýystyrýlary qajet. Sondaı-aq halyqty jáne kommýnaldyq-turmystyq sektordy kómirmen qamtamasyz etý jónindegi aqparatty ýaqytyly usynyp otyrýdy tapsyramyn», – dedi Qaıyrbek Óskenbaev.

Indýstrııalyq damý komıtetiniń tóraǵasy I.Ospanovtyń aıtýynsha, búgingi tańda óńirlerge qajetti 9 mln tonna kómirdiń 4 mln tonnasy jetkizilgen. Bul kórsetkish jyldyq jospardyń 44,3% quraıdy. Qamtamasyz etý kórsetkishteri men qajettilik kóleminiń tómendeýi jergilikti atqarýshy organdardyń jylytý maýsymyna halyqtyń jyldyq josparly qajettilik kólemine engizgen túzetýlerine baılanysty ekenin atap ótken jón.

Aıta keterligi, keıbir buqaralyq aqparat quraldarynda elimiz boıynsha kómirdiń baǵasy aıtarlyqtaı ósti degen aqpar tarady. Osyǵan baılanysty vedomstvo basshysy elimizdiń kómir razrezderiniń ókilderin jınap, aqparattyń anyq-qanyǵyn anyqtady. Razrezderdegi kómirdiń quny ótken jylǵy deńgeıde saqtalǵan. Máselen, Qazaqstandaǵy eń iri kómir óndirýshilerdiń biri «Shubarkól Kómir» AQ bir tonna kómirdi 5 500 teńgeden satsa, «Maıkýben-Vest» JShS kómirdi 6 105 teńgeden, al «Qarajyra» AQ tonnasyna 8 300 teńgeden saýdalaıdy. Budan basqa, geografııalyq ornalasýy, tasymaldaý ádisi jáne kómir markasyna baılanysty quny tonnasyna 8 myńnan (razrezge jaqyn ornalasqan eldi-mekenderde) 21 600 teńgege deıin aýytqıdy.

«Jalpy halyqty qatty otynmen qamtamasyz etý úshin mınıstrlik tarapynan birqatar naqty shara qabyldanǵan. Atap aıtqanda, aldaǵy jylytý maýsymy kezeńinde otyn tapshylyǵyn boldyrmaý maqsatynda QR Indýstrııa jáne ınfraqurylymdyq damý mınıstrligi jylytý maýsymy kezeńinde avtomobıl kóligimen kómirdi elden tys jerge shyǵarýdy 6 aıǵa shekteý týraly buıryq qabyldady. Sheshim kómir razrezderiniń ókilderi jáne óńir ákimdikterimen birlese otyryp ázirlengen»,-delingen habarlamada.