Kombınatta 8 saǵat boıy tikemnen tik turyp jumys isteımin — temir jonýshy

<p>AQTÓBE. KAZINFORM &mdash; Temir jonýshy Gúljanat Tanabergenova taý-ken baıytý kombınatynda eńbek etedi. Ol aýysymyna 8 saǵat boıy tikesinen tik turyp shahtany bekitýge arnalǵan temirdi uzyndyǵyna sáıkes qıyp, eki ushyn jonyp beredi. Jaýapty qyzmette júrgen úsh balanyń anasy 8 naýryz &mdash; Halyqaralyq áıelder kúni erekshe iltıpatqa bólengenimen, zaýyttaǵy ár áıel óz qyzmetin toqtaýsyz atqara beretinin jetkizdi.</p>

Dóń ken-baıytý kombınatynda 8 myńǵa jýyq adam eńbek etse, onyń 2,5 myńy — áıel.

Áıelder munda kóbine kran, konveıer mashınısi, frezershi, temir jonýshy, dánekerleýshi, sıgnalshy, marksheıder, geolog, ortalyq zerthana laboranttary, sham berýshi (lampovshıtsa) sekildi túrli qyzmetterdi atqarady. 

20 jylǵa jýyq tájirıbesi bar maman Gúljanat Tanabergenova da sol óndiris ornyndaǵy jaýapty qyzmetkerdiń biri. Temir jonýshy bul salaǵa kelmes buryn oqyp, tájirıbe jınap alǵan. 

— Aýdanymyzda adamdardyń kóbi sol óndiriste jumys isteıdi. Ózim de Hromtaý taý-ken kolledjin oqyp aldym. Ol kezde temir jonýshy mamandyǵy ǵana ózime saı keldi. Sol oqý ornynda oqyp, kombınatta tájirıbeden ótýge bardym. Shynymdy aıtsam, qorqyp, jylap ta aldym. Sebebi alyp qural-jabdyqtar kóp, biz teorııalyq bilimdi praktıkaǵa ushtastyrýymyz kerek. Jas kezimde ony da meńgerip, eki jylda temir jonýshy sanat da kóterip aldym. Qazir jumysym ózime unaıdy, — deıdi mehanıkalyq jóndeý tsehynyń temir jonýshysy Gúljanat Tanabergenova.

Úsh balanyń anasy qazir bir ulynyń shahtada jumys istep júrgenin aıtty. Temýrlan Eltaı Dóń ken-baıytý kombınatynda 700 metr tereńdikke túsip, ken óndiredi.

Al anasy bolsa, jerastyndaǵy qaýipsizdikti qamtamasyz etýge arnalǵan temirdi jonyp, ázirlep beredi. 

— Biz tańerteń jumysty qabyldaǵan kezde jospar beriledi. Sol josparǵa sáıkes kúnine uzyndyǵy 545 sm bolatyn 400 qıyndy daıyndap, eki jaǵyn jonamyz. Bul shahtaǵa qajetti temir bólshegi, ıaǵnı, bekitýge paıdalanady. Qazir bir aýysymda 12 adam jumys isteıdi. Temir jonýshynyń janynda frezershiler de bar. Olar da ózim sekildi qyz-kelinshekter. Bizder qıyp, daıyndap bergendi, ózge mamandar qurastyrady. Qol kúshi qajet etetin jumysty er adamdar atqarady. Jumys aýyr da, jeńil de emes. 8 saǵat boıy tikesinen tik turyp, stanokta temir ólshemin keltiremiz. Biz qımyldap, jumys istep qalǵan adambyz. Keıde eńbek demalysyna shyqqan kezde búkil denem aýyrady. Sonda da óz jumysymdy qatty qurmetteımin. Osy jerden zeınetke shyǵamyn dep oılaımyn, — dedi Gúljanat Tanabergenova.

Keıde densaýlyǵy syr berip, em-dom jasasa da ol mamandyǵyn, jumys ornyn aýystyrǵysy joq.

Temir jonýshy mereke men túrli toı-dýmanǵa qaramaıtyn, tek aýysym reti saqtalatyn jaýapty jumysta da merekelik kóńil-kúıdi saqtaýǵa bolatynyn aıtty.

Halyqaralyq áıelder kúni anasyn quttyqtap barady, balalarynan da quttyqtaý qabyldaıdy. 

— Bul erekshe mereke. Anamyzdy ortaǵa alyp, quttyqtap, meıirimine bólenip qaıtamyz. Balalarym da únemi jyly sózin arnap jatady. Budan artyq adamǵa, anaǵa eshteńe qajeti joq. Biz jan-jaǵymyz aman bolsa, taý da qoparamyz ǵoı, — dedi Gúljanat Tanabergenova.