«Qoljetimdi» derbes derekter: Turǵyndardan 1400-den astam shaǵym tústi

<p>ASTANA. KAZINFORM &ndash; &laquo;Memlekettik tehnıkalyq qyzmet&raquo; AQ bıyl 5 naýryzda zaimer.kz (&laquo;Robokesh.kz&raquo; &laquo;MQU&raquo; JShS) mıkroqarjy uıymy klıentteriniń derbes derekteriniń taralyp ketýin habarlaǵan bolatyn. Naqtylasaq, derekter qupııalylyǵyn buzýdyń 2 mıllıonnan astam jaǵdaıy anyqtaldy.</p>

QR Tsıfrlyq damý, ınnovatsııalar jáne aeroǵarysh ónerkásibi mınıstrligi anyqtalǵan oqıǵalar aıasynda jáne derbes derekterdi qorǵaý salasyndaǵy óz quzyreti sheńberinde jedel áreket etti. Egov Mobile mobıldi qosymshasyn paıdalana otyryp, azamattardy habardar etý jáne osy derekterdiń taralyp ketýimen baılanysty yqtımal táýekelderdi azaıtý boıynsha usynystar berý jumystary júrgizildi.

«7 naýryzdan bastap búginge deıin TsDIAÓM-niń Aqparattyq qaýipsizdik komıtetine azamattardan 1400-den astam shaǵym men ótinish kelip tústi. Komıtet Ákimshilik quqyq buzýshylyq týraly kodekstiń 79-babyna sáıkes buzýshylyq faktileri boıynsha muqııat tekserýler júrgizedi. Buzýshylyqtar rastalǵan kezde, ákimshilik aıyppuldardy qosa alǵanda, tıisti sharalar qabyldanatyn bolady», delingen mınıstrliktiń resmı habarlamasynda.

Budan bólek, qylmystyq quqyq buzýshylyqtardy kórsetetin materıaldar anyqtalǵan jaǵdaıda Aqparattyq qaýipsizdik komıteti olardy odan ári tekserý úshin Іshki ister mınıstrligine joldaıtynyn atap ótken jón.

«Derekterdiń taralyp ketýinen materıaldyq zalal faktileri kezdesken jaǵdaıda, azamattar óz quqyqtaryn qorǵaý jáne keltirilgen zalaldy óteý úshin Іshki ister mınıstrligine nemese sotqa óz betinshe júgine alady. Aqparattyq qaýipsizdik komıteti derbes derekteri taralýy múmkin barlyq azamattardy ózderiniń qupııa aqparattaryn qorǵaý úshin qajetti sharalardy qabyldaýǵa jáne quzyretti organdar usynǵan usynystardy oryndaýǵa shaqyrady», - dep habarlandy mınıstrlikten.