Qoljetimdi baspana baǵdarlamasyn sátti júzege asyryp jatqan óńirler ataldy

ASTANA. QazAqparat - «7-20-25» ıpotekalyq baǵdarlamasyn tabysty túrde iske asyryp jatqan óńirlerdiń kóshin Astana jáne Almaty qalalary bastady, dep habarlaıdy QazAqparat tilshisi.

«Baǵdarlamanyń júzege asyrylýy týrasynda aımaqtar boıynsha kórsetkishti keltirsek: qatysýshylardyń sanynyń kóbi jaǵynan kósh basynda Astana qalasy tur. Sodan keıingi orynda - Almaty qalasy. Mańǵystaý, Aqtóbe, Shyǵys Qazaqstan jáne Aqmola oblystary da aldyńǵy qatardaǵy óńirlerdiń qatarynan kórindi», - dedi Qaırat Altynbekov OKQ-da ótken baspasóz máslıhaty barysynda.

Qaırat Altynbekovtyń aıtýynsha, alǵashynda bastapqy qoldanystaǵy páterlerdiń jetispeýshiligi  kese kóldeneń shyqqan. Ásirese, bul másele óńirlerde aıqyn baıqalǵan.

«Atalǵan problemany birjaqty etý úshin Ulttyq bank «7-20-25» baǵdarlamasyna ózgerister engizgen bolatyn. Oǵan sáıkes, «Baspana» kompanııasy «7-20-25» baǵdarlamasy boıynsha baspana turǵyzý úshin jergilikti atqarýshy organdarǵa 150 mlrd teńgege deıin bólýge daıyn ekenin málim etken bolatyn», - dep atap ótti ol.

Bul bastamany birinshi bolyp Shymkent qalasynyń ákimdigi ilip áketipti. Ótken aptada ǵana 10 mlrd teńgeniń oblıgatsııasy shyǵarylyp, «Baspana» kompanııasy ony satyp alǵan. Osylaısha, Shymkent qalasynda jaqyn arada «7-20-25» baǵdarlamasy boıynsha alǵashqy úı boı kótermek.

Eske sala ketsek, osy baspasóz máslıhaty barysynda Qaırat Altynbekov Sberbanktiń qosylýymen «7-20-25» baǵdarlamasyna qatysýshy bankterdiń sany segizge jetkenin málim etken edi.