«Qoljetimdi baspana-2020» baǵdarlamasy boıynsha jaratylmaǵan qarjy oıdaǵydaı ıgergen óńirlerge beriletin bolady - B. Saǵyntaev

ASTANA. QazAqparat - Búgin Úkimet úıinde QR Premer-Mınıstriniń birinshi orynbasary Baqytjan Saǵyntaev selektorlyq rejimde májilis ótkizdi, otyrys barysynda aǵymdaǵy jylǵy áleýmettik-ekonomıkalyq damý qarqyny jáne «Qoljetimdi baspana-2020» baǵdarlamasyn iske asyrý barysy qaraldy.

Bul týraly QR Premer-Mınıstriniń baspasóz qyzmeti habarlady.

Sondaı-aq májiliste qatysýshylar kóktemgi-egis jumystaryn uıymdastyrý jáne júrgizý, aǵymdaǵy sý tasqynynyń jaǵdaıy men óńirlerdegi áleýmettik mańyzy bar azyq-túlik ónimderine baǵanyń turaqtylyǵy máselelerin talqylady. Májiliske ortalyq memlekettik organdar, oblystar, Astana men Almaty qalalary ákimdikteriniń basshylary qatysty.

"Qoljetimdi baspana-2020" baǵdarlamasyn iske asyrý barysy týraly óńirlik damý mınıstri B. Jámishev baıandady. Onyń aıtýynsha, qańtar-naýryzda turǵyn úı qurylysyna 110 mlrd. teńge (barlyq qarjylandyrý kózderinen) jumsaldy, bul ótken jyldyń sáıkes kezeńimen salystyrǵanda 123 paıyzdy quraıdy. 1,7 mln. tekshe metr turǵyn úı paıdalanýǵa berildi, ol 2013 jyldyń tıisti kezeńimen salystyrǵanda, 111 paıyzdy qurap otyr.

Áleýmettik-ekonomıkalyq damý qarqyny týraly QR Ekonomıka jáne bıýdjettik josparlaý vıtse-mınıstri M. Ábilqasymov baıandady. Aldyn ala derekter boıynsha, aǵymdaǵy jylǵy qańtar-naýryzda ІJÓ ósimi 2,9 paıyzǵa jetken. Memleket basshysynyń tapsyrmasyna sáıkes, Úkimettiń aldynda 2014 jyly ekonomıkanyń ornyqty ósimin 6-7 paıyz deńgeıine jetkizý mindeti tur.

Tótenshe jaǵdaılar mınıstri V. Bojkonyń málimdeýinshe, elde sý tasqynyna qatysty jaǵdaı turaqty. Barlyq sý qoımalarynda toltyrý kólemi jobalyq kólem sheginde. Tasqyn qaýpiniń aldyn alý úshin sýdy qaýipsiz jiberý júzege asyrylýda, bul óz kezeginde ózen arnasyn shaıyp, ekologııany jaqsartýǵa múmkindik beredi.

Aǵymdaǵy jyly aýyl sharýashylyǵy daqyldaryn 21,8 mln. gektar alqapqa egý josparlanýda, bul 2013 jylmen salystyrǵanda, 313 myń gektarǵa nemese 1,5 paıyzǵa kóp, dep málim etti Aýyl sharýashylyǵy mınıstri A. Mamytbekov.

"Qoljetimdi baspana" baǵdarlamasyn iske asyrýǵa qarajat tolyq kólemde bólindi. Oblys ákimdikteri bul máseleni erekshe baqylaýda ustaýy tıis. Igerilmegen qarajat, oıdaǵydaı ıgergen óńirlerge beriletin bolady», - dep atap ótti keńeste B. Saǵyntaev.