«Qoljetimdi baspana-2020» baǵdarlamasy aıasynda astanalyqtar 678 páterge ıe bolmaq
«Jastar» saraıy ǵımaratyna jınalǵan baǵdarlamaǵa qatysýshylardyń aldy 2004 jyldan beri úı kezeginde turǵan jandar. Eki aptaǵa jalǵasatyn páterlerdi taratý jumysynyń alǵashqy kúninde kelýshilerdiń sany óte kóp. Búginde sany 32 myńnan asqan baspana kezegindegiler úshin bul joly «Samuryq-Qazyna» jyljymaıtyn múlik qory» AQ qala ákimdigi arqyly bir sharshy metri 180 myń teńgelik 678 páter usynýda. Jalǵa berý úshin - 43, satýǵa - 304 eki bólmeli jáne jalǵa berý úshin - 126, satýǵa - 205 úsh bólmeli baspanalar daıyndalýda.
«Іrikteý jergilikti atqarý organdary júrgizgen baspana alýǵa muqtaj azamattardyń tizimine sáıkes kezek boıynsha júrgiziledi. Biz barlyq qajetti sharalardy jasadyq. Qujattardy qabyldaý kezinde HQK ortalyǵy qyzmetkerleriniń bolýyn qamtamasyz ettik. Ekinshi qabatta qajetti anyqtamalardy alýǵa múmkindik bar, sonymen qatar baspanaǵa muqtaj jandardyń jaǵdaıy týraly anyqtama alýǵa bolady. Bizdiń qyzmetkerler halyqqa baǵdarlamanyń sharttary týraly egjeı-tegjeıli baıandap berýde», - deıdi Astana qalalyq turǵyn úı basqarmasy dırektorynyń orynbasary Asqar Eleýjanov. Ár sharshy metri satyp alǵan jaǵdaıda 180 myń teńgeni, al jalǵa alǵanda ár aı saıynǵy tólem 95 myń teńgeni quraıtyn páterler Astana qalasynda kommýnaldyq turǵyn úı qorynan turǵyn úıge muqtajdar esebinde turǵan jáne memlekettik qyzmetkerlerge, bıýdjettik uıym qyzmetshilerine, áskerı qyzmetkerlerge, ǵaryshkerlikke kandıdattarǵa, ǵaryshkerlerge, arnaýly memlekettik organ qyzmetkerlerine jáne memlekettik saılanbaly qyzmet atqaratyn adamdarǵa, halyqtyń áleýmettik álsiz tobyna jatatyn azamattarǵa beriledi. Qujat qabyldaý 25 qazanǵa deıin dúısenbi-juma kúnderi saǵat tańǵy 9-dan keshki 18-ge deıin jalǵasady. Senbi kúni kelýshilerge saǵat 9-dan 13-ke deıin qyzmet kórsetiledi, dep habarlanǵan elorda ákimdiginiń resmı saıtynda.