Kolýmbııada Qazaqstannyń Qurmetti konsýldyǵy ashyldy
Bul týraly QazAqparat QR Syrtqy ister mınıstrliginiń Telegram kanalyna silteme jasap habarlaıdy.
Jergilikti bıznesmen, «Croda Oil&Gas Latin America» kompanııasynyń dırektory Omar Valdes taıaý jyldary Qazaqstannyń Qurmetti konsýly qyzmetin júzege asyratyn bolady.
Іs-sharaǵa Qazaqstannyń Brazılııadaǵy Elshisi Qaırat Sarjanov, Kolýmbııa SІM Eýropa departamentiniń dırektory Hýan Kastro, qalanyń qoǵamdyq-saıası jáne isker toptarynyń, dıplomatııalyq korpýs pen medıa qoǵamdastyqtyń ókilderi qatysty.
Óz sózinde Q. Sarjanov Kolýmbııa Úkimetine Qazaqstannyń Qurmetti konsýldyǵynyń ashylýyna qoldaý kórsetkeni úshin alǵysyn bildirip, Omar Valdeske konsýldyq patentti onlaın rejımde tabys etti. Ol Qurmetti konsýldyqtyń ashylýy Nurs-Sultan men Bogota arasyndaǵy ekijaqty kún tártibin, ásirese saýda, ınvestıtsııalyq jáne gýmanıtarlyq baǵyttarda, onyń ishinde Qazaqstan 2019 jylǵy shildede baqylaýshy mártebesin alǵan Tynyq muhıty alıansy sheńberinde keńeıtý jónindegi saıası erik-jigeriniń kórsetkishi bolyp tabylatynyn atap ótti.
Kolýmbııa SІM Eýropa departamentiniń dırektory Hýan Kastro Qazaqstannyń Qurmetti konsýldyǵynyń ashylýymen quttyqtady. Bul 2012 jyly mınıstrlikaralyq saıası konsýltatsııalar tetigin ornatýdan bastalǵan ekijaqty baılanystardy odan ári damytýǵa yqpal etetin bolady. Kolýmbııalyq dıplomat Bogota qalasynda 2019 jylǵy jeltoqsanda ótken Dıplomatııalyq jáne qyzmettik pasporttardyń ıeleri úshin vızasyz rejım týraly kelisimge qol qoıý jáne ulttyq pasporttardyń ıeleri úshin ony ózara qamtamasyz etý jónindegi ýaǵdalastyqqa qol jetkizý arqyly Syrtqy ister mınıstrleriniń orynbasarlary deńgeıinde konsýltatsııalardyń 4-raýndynyń qorytyndylary boıynsha qol jetkizilgen vızasyz rejımniń mańyzdylyǵyn atap ótti.
Ol Kolýmbııa Úkimetiniń EYDU-ǵa kirý tájirıbesimen bólisýge daıyn ekenin atap ótip, kelesi jyly simaralyq konsýltatsııalardyń 5-shi raýndyn ótkizýdi usyndy.
Óz kezeginde, Qazaqstannyń Qurmetti konsýly Omar Valdes Qazaqstan Úkimetine senim bildirgeni úshin alǵys aıtyp, eki el arasyndaǵy, sonyń ishinde aýyl sharýashylyǵy, taý-ken jáne munaı ónerkásibindegi ózara is-qımyldyń áleýetti baǵyttaryn belgiledi. Bıznesmen kolýmbııalyq kásipkerlerdi qazaqstandyq seriktestermen iskerlik baılanys ornatý jáne birlesken jobalardy júzege asyrý úshin Qurmetti konsýldyqtyń múmkindikterin paıdalanýǵa shaqyrdy.