Kolýmbııada 1400 tonna esirtki tárkilendi

<p>BOGOTA. KAZINFORM &ndash; Kolýmbııa bıligi ondaǵan basqa eldermen birlese otyryp, alty apta ishinde 225 tonna kokaın tárkiledi, bul esirtkige qarsy operatsııalar arasynda álemdik rekord boldy. Bul týraly <a href="https://www.theguardian.com/world/2024/nov/27/colombia-drug-bust-narco-submarine-australia" target="_blank" rel="noopener">The Guardian</a> habarlady.</p>

Kolýmbııa men 62 memleket qatysqan alty aptaǵa sozylǵan «Orıon» operatsııasy barysynda kokaın tasymaldaǵan 6 teńiz kemesi toqtatylyp, barlyǵy 1400 tonna esirtki, onyń ishinde 1000 tonnadan astam marıhýana jáne 225 tonna kokaın tárkilendi. Kontrabandanyń bir bóligi Avstralııaǵa esirtki tasymaldaýdyń jańa baǵytyna bara jatqan sýasty qaıyǵynan tabyldy.

Sondaı-aq, esirtkige qarsy operatsııa barysynda zańsyz qarý-jaraq satýshylar men ımmıgranttar kontrabandasymen aınalysqan 400-den astam adam ustaldy.

Bul operatsııa Latyn Amerıkasyndaǵy kartelder úshin aýyr soqqy boldy. Birikken Ulttar Uıymynyń baǵalaýy boıynsha álemde jyl saıyn 2700 tonna kokaın óndiriledi. Kolýmbııa bıligi 2022 jyly 671 tonna kokaın tárkiledi.

– Bul kokaın saýdasynyń mańyzdy bóligi. Bul myńdaǵan dozalanǵan ólimniń aldyn alady jáne 8,5 mıllıard dollardyń kartelderge túsýine jol bermeıdi, bul osy qylmystyq uıymdardyń paıdasyna kelergi jasaıdy, – dedi Kolýmbııa Áskerı-teńiz kúshteriniń esirtkige qarsy bólimshesiniń dırektory, kapıtan Manýel Rodrıges.

Rodrıgestiń aıtýynsha, zańsyz jetkizilimderdi toqtatý úshin seriktes elder ushaqtardy, tikushaqtardy jáne fregattardy biriktirgen, biraq barlaý málimetterimen bólisý eń basty utymdylyq bolǵan.

Aıta keteıik, Qazaqstanda esirtki óndirýshilerine jazany kúsheıtýge baǵyttalǵan mańyzdy zań jobasy talqylanýda. Jazany ómir boıyna bas bostandyǵynan aıyrýǵa deıin qataıtý usynyldy.