Kólsaı men Qaıyńdyda týrızm arqyly kóleńkeli aqsha jasaýǵa jaǵdaı jasalǵan

<p>Almaty oblysynda eriktiler óńirdiń týrıstik nysandaryna monıtorıng júrgizip, Kólsaı, Qaıyńdy jáne Esik kólderinen jemqorlyq táýekelderin anyqtady, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

«Monıtorıngke jelide taraǵan týrızm ınfraqurylymynyń jaı-kúıin synaıtyn beınerolıkter negiz boldy. Nátıjesinde ekologııalyq alym tóleýdegi jáne maqsatty paıdalanýdaǵy ashyqtyqtyń joqtyǵy, modýldik qoǵamdyq dárethanalardyń jumys istemeýi jáne olarǵa talapqa saı tehnıkalyq qyzmet kórsetlmeıtini, sondaı-aq qyzmetterdi talapqa saı kórsetpeý sııaqty jemqorlyq táýekelderi anyqtaldy», — dep habarlady Sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń baspasóz qyzmeti.

Atalǵan týrıstik nysandardy zerdeleý barysynda «Kólsaı kólderi» ulttyq parkiniń aýmaǵyna kirgen kezde qyzmetkerler kassalyq apparatty aınalyp ótý úshin tólemniń qolma-qol nysanyn paıdalana alatyny anyqtaldy.

Sondaı-aq, 2022 jyly Kegen aýdany ákimdigi bir danasyn 11,4 mln teńgege satyp alǵan statsıonarlyq modýldik dárethana jumys istemeı tur (elektr jaryǵy men sý joq).

Odan basqa taǵy úsh dárethana jabyq boldy.

Eriktiler sondaı-aq Saty aýylynan Qaıyńdy kóline deıingi joldyń nasharlyǵyn atap ótti. Saldarynan týrıster kólge jetý úshin jergilikti turǵyndardyń qyzmetine júginýge májbúr.

Atalǵan faktilerdiń barlyǵy Almaty oblysynyń týrıstik salasy men ımıdjine tikeleı áser etetinin eskere otyryp, eriktiler birneshe keńes berdi:

• týrıstik ınfraqurylymdy jańartýdy eskere otyryp, oblystyń týrıstik salasyn damytý jónindegi keshendi strategııalyq qujat ázirleý;
• saıahattaýǵa qolaıly jaǵdaı jasaý úshin aımaqtyń jaı-kúıi men sanıtarlyq-gıgıenalyq toraptarmen qamtamasyz etilýin taldaý;
• Saty aýylynan Qaıyńdy kóline deıin jol salý jáne týrısterdi tasymaldaý úshin «Eýro-4» standartynan tómen avtomobılderdi paıdalanýdy shekteý;
• týrıstik oryndardaǵy aǵash dárethanalardyń kózin qurtý.