Kólsaı kólderi, Altyn Emel, Sharyn ulttyq parkterinde ınvestordy anyqtaýǵa ashyq baıqaý jarııalandy
Almaty qalasynda «Kólsaı Kólderi», «Altyn Emel» jáne Sharyn memlekettik ulttyq tabıǵı parkteriniń Qoǵamdyq keńesteri ekologııalyq týrızmdi damytýdyń Tujyrymdamalary boıynsha birlesken jınalys ótkizdi.
Sebebi ulttyq parkterdiń rekreatsııalyq aýmaqtaǵy jerlerinde ekotýrızmdi damytý maqsatynda, Erejege sáıkes, tenderlik qujat jobasy aldyn ala talqylanyp, baıqaý ashyq jarııalanýy tıis.
Jıyndy ashqan QR Ekologııa, geologııa jáne tabıǵı resýrstar mınıstriniń orynbasary Erlan Nysanbaev vedomstvo Prezıdent tapsyrmasy boıynsha ekotýrızmdi órkendetýdiń keshendi sharalaryn júzege asyryp jatqanyn aıtty.
«Ekologııalyq týrızmdi damytýdyń Tujyrymdamalary tanystyrylyp, qoǵammen maquldandy. Osyǵan baılanysty qabyldanǵan Tujyrymdamaǵa sáıkes, parkterdiń Bas josparlarynyń ekotýrızm ınfraqurylymyna qatysty jerlerine ózgeris engizildi»,- dedi vıtse-mınıstr.
Úsh ulttyq parktiń basshylary Tujyrymdamaǵa sáıkes júzege asatyn ınfraqurylym jobalary týraly baıandady. Olardyń sózinshe, barlyq parkter aýmaǵynda 2021-2023 jyldar aralyǵynda vızıt-ortalyqtar, glempıng, kempıngter, etno-qonaq úıler, etnoaýyldar, kórý alańdaryn jáne basqa da ınfraqurylym nysandaryn salý josparlanǵan. Barlyq nysandar negizgi tabıǵı nysandarǵa zııan tıgizbes úshin qashyqtaý jerde ornalasady.
Investorlarǵa erekshe qorǵalatyn aýmaqtar týraly Zańdy saqtaý, tabıǵı nysandardy buzbaı, qorshaǵan ortany qorǵaý sharalaryna basymdyq bere otyryp jumys isteý talaby qoıylady. Tabıǵatqa zııan keltiretin sharýashylyqqa tyıym salynady.
Sonymen birge jıynda Qoǵamdyq keńes músheleri ekotýrızmdi damytý jobasyn júzege asyrýshylardyń jergilikti halyqpen tyǵyz jumys isteýi tıistigi týraly aıtty.
«Ulttyq parkter janyndaǵy Qoǵamdyq keńester qabyldanǵan sheshimderdiń ashyqtyǵyn qamtamasyz etý maqsatynda quryldy. Sondyqtan Qoǵamdyq keńes músheleriniń pikiri kez kelgen sheshim qabyldanǵan kezde eskeriledi. Ulttyq parkterdiń jerlerin týrıstik jáne rekreatsııalyq qyzmetti júzege asyrý maqsatynda uzaq merzimdi paıdalanýǵa berý boıynsha qurylǵan konkýrstyq komıssııalar quramyna da Qoǵamdyq keńester músheleri qosylady»,- dedi Erlan Nysanbaev.
Aıta keteıik, ulttyq parkterde ekotýrızmdi damytý boıynsha baıqaýǵa qyzyǵýlylyq tanytqan kez kelgen ınvestor qatysa alady.