Kólsaı kólderi aýmaǵyna elektromobılderdiń ǵana kirýine ruqsat berilýi múmkin

<p>Kólsaı kólderi memlekettik ulttyq tabıǵı parkiniń aýmaǵyna tek elekromobılderdi ǵana kirgizý máselesi pysyqtalyp jatyr. Bul jaıynda Májilis depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan, dep habarlaıdy Kazinform.</p>

«Elektromobılderdiń saıabaq (Kólsaı kólderi memlekettik ulttyq tabıǵı parki) aýmaǵyna erekshe kirý máselesin Ekologııa jáne tabıǵı resýrstar mınıstrligi Almaty oblysynyń ákimdigimen birlesip pysyqtaýda. Ulttyq parktegi aýanyń paıdalanylǵan gazdarmen lastanýyna keletin bolsaq, qazirgi ýaqytta Kólsaı kólinen 2 shaqyrym jerde, jergilikti atqarýshy organnyń aýmaǵynda avtoturaqty ornalastyrý máselesi pysyqtalýda», - dedi Úkimet basshysynyń orynbasary jaýabynda.

Onyń atap ótýinshe, «Erekshe qorǵalatyn tabıǵı aýmaqtar týraly» Zańnyń 23-babyna sáıkes, erekshe qorǵalatyn tabıǵı aýmaqtardyń jerin alyp qoıýǵa jol berilmeıdi. Osyǵan baılanysty 2007 jyldan bastap ulttyq parktiń jeri jeke menshikke berilmegen.

«Qazirgi ýaqytta ulttyq parkte 2 uzaq merzimdi jáne 8 qysqa merzimdi paıdalanýshy bar. Park jeriniń barlyq paıdalanýshysy óz qyzmetin azamattyq zańnamaǵa sáıkes uzaq merzimdi jáne qysqa merzimdi paıdalaný sharttary negizinde júrgizedi. Qurylys eskızge (eskızdik jobaǵa) sáıkes ázirlengen jobalaý-smetalyq qujattamamen birlesip júrgiziledi. Búgingi tańda qurylysta buzýshylyqtar anyqtalǵan joq», - dedi Tamara Dúısenova.