Kolonııalarda beınebaqylaý kameralaryn syndyryp, búldirgenderge jaza qatańdatylady

<p>ASTANA. KAZINFORM &ndash; Elimizde kolonııalarda jáne ýaqytsha ustaý ızolıatorlaryndaǵy beınebaqylaý kameralaryn syndyryp, búldirgenderge jaza qataıdy. Bul týraly Іshki ister mınıstrliginiń resmı ókili Shyńǵys Alekeshev málim etti.</p>

«Jazany óteý tártibin saqtaǵysy kelmegen keıbir sottalǵandar beınekameralardy qasaqana zaqymdaýdy shyǵardy. Olar 683 beınebaqylaý kamerasyn syndyryp, isten shyǵardy. Mundaı zańsyz áreketter aımaqtardy baqylaýsyz qaldyryp qana qoımaı, memlekettik bıýdjetke aıtarlyqtaı shyǵyn keltiredi», - dedi Shyńǵys Alekeshev vedomstvoda onlaın ótken baspasóz máslıhatynda.

Osy oraıda Qylmystyq kodekske tıisti túzetýler engizilgen.

«Qylmystyq-atqarý júıesi mekemelerinde, tergeý jáne ýaqytsha ustaý ızolıatorlarynda beınebaqylaý júıesin qasaqana joıý nemese búldirý» áreketi boıynsha 428-1-baby engizildi. Bapta 7 jylǵa deıin bas bostandyǵynan aıyrý jazasy qarastyrylǵan», - deıdi ol.

Aıta keteıik, búginde elimizde 37 myń adam jazasyn ótep jatyr.