Qolóner sheberlerine memleket tarapynan qoldaý kerek - mańǵystaýlyq jas zerger

NUR-SULTAN. QazAqparat – Tóremurat Ómir – qolóner sheberi. Ol zergerlikke bala kúninen qyzyǵýshylyq tanytqan, sebebi onyń ata-anasy men otbasy músheleri - ónerge, onyń ishinde zergerlik ónerge jaqyn adamdar. Búginde mańǵystaýlyq jas maman ulttyq murany kásipke aınaldyryp, qazaqtyń zergerlik óneriniń damýyna óz úlesin qosyp júr. Osy oraıda QazAqparat tilshisi qolóner sheberin áńgimege tartqan edi.

«Men 1995 jyly Mańǵystaý oblysy Beıneý aýdany Beıneý aýylynda dúnıege keldim. Aýyldaǵy mektepten bilim alyp, sol jerdegi Q. Baqtybaıuly atyndaǵy beıneleý óneri mektebiniń kórkemsýret bólimin bitirip shyqtym. Mektep bitirgen soń Almatydaǵy T. Júrgenov atyndaǵy óner akademııasynyń «sándik qoldanbaly óner» kafedrasynyń metaldyq kórkemdeý mamandyǵyna oqýǵa tústim. Negizi zergerlik óner ákemnen bastaý alady, ákem osy ispen 40 jyldan astam ýaqyt aınalysyp keledi. Al anam - belgili fılolog. Zergerlik óner ákemniń negizgi kásibi bolǵandyqtan, men de bul salaǵa bala kúnimnen jaqyn bolyppyn. Ata-anamnyń aıtýynsha, kishkentaıymnan ákemniń sheberhanasyna baryp, sýret salyp, buıymdardy jasaý barysyna qyzyǵýshylyq tanytyppyn», - dedi Tóremurat Ómir.

Jas zergerdiń aıtýynsha, arǵy atasy da qolóner sheberi bolǵan. Jáne olardyń otbasy úshin zerger bolý - ákeden balaǵa berilip kele jatqan mura.

«Jalpy Keńes úkimeti kezinde qazaqtyń zergerlik óneri biraz qıyndyqqa ushyraǵan. Sebebi bılik qolónerdiń bul túrin damytýǵa tyıym salǵan. Al tyıymǵa qaramaı zergerlikpen aınalysqandardyń kózin qurtyp otyrǵan. Táýelsizdik alǵaly ulttyq ónerimizdi qaıta jandandyra bastadyq. Óz basym zergerlikti 2014 jyly qolǵa alyp, al kásibı túrde 2016 jyldan bastap aınalysyp kelemin. Búginde buıymdardyń barlyq túrin jasaımyn. ıAǵnı, saqına, bilezik, syrǵa, shashpaý, sholpy, júzik jáne taǵy basqa. Sondaı-aq, er-turmanmen birge turmys zattaryn da jasaımyn. Tapsyrys tússe joǵary deńgeıde, ulttyq naqyshta jasap shyǵaramyz», - deıdi ol.

Sondaı-aq, sheber zerger mamandyǵyn tańdaıtyn búgingi jastarǵa qatysty pikirin ortaǵa saldy.

«Elimizde qolónerge baýlıtyn joǵarǵy jáne orta arnaýy oqý oryndary barshylyq. Ony bitirip shyǵyp jatqandar da jetkilikti, biraq onyń bári zerger bolyp ketpeıdi. Onyń birneshe sebebi bar. Birinshiden, zergerlikpen aınalysý úshin arnaıy qural-jabdyq qajet, ol tapshy jáne qymbat. Ekinshiden, bul salaǵa memlekettik turǵydan jaǵdaı, qoldaý jasalmaǵan. Zergerlik mamandyǵyn meńgerseń, jalpy mektepte nemese qolóner mektebinde muǵalim ǵana bola alasyń. Sosyn mýzeı qyzmetkeri bola alasyń. Al zergerlik kóbisi óz kásibin ashyp, isin dóńgeletkisi keledi. Biraq, jeke kásipti júrgizý bárine birdeı buıyra bermeıdi. Jalpy ózimniń sala mamany retinde boljaýymsha aldaǵy 10 jyl ishinde elimizde zergerlerdiń qatary kóbeıe túsedi», - deıdi jas zerger.

Onyń aıtýynsha, búginde zergerlik buıymdardy jasaýmen qatar, ony sata bilý de - óner.

«Qazir burynǵydaı bazarda otyryp sata almaısyń. Búginde zaman basqa, suranys pen talap ta basqa. Jasaǵan eńbegińdi sata bilý - ol da óner. Jalpy zergerlik buıymdarǵa suranys bar. Zergerlikpen kún kórgen adam birden tabysqa jetedi dep aıta almaımyn. Ásirese alǵashqy 5 jyl - synaq merzimi. Túrli qıyndyqqa tap bolasyń, sol kedergilerge tótep bere alsańyz, ári qaraı alyp ketýge bolady. Zerger retinde meniń armanym, usynysym - qolóner sheberlerine memleket tarapynan qoldaý bolsa. Sosyn salany damytyp, túrli zergerlerdiń basyn qosatyn shyǵarmashylyq baıqaýlar uıymdastyrylsa deımin. Jas zergerlerge qoldaý kórsetilse, olardyń jumysy nasıhattalsa, sonymen qatar eńbegi sińgen zergerlerge ataq-dáreje berilse., bul sala birshama damıtyn edi. Sebebi zergerlik óner - qazaqtyń ulttyq ımıdji. Mysaly, sportshylarǵa «sport sheberi» degen dáreje beriledi ǵoı, sol sııaqty qolónerdiń de óz sheberleri bolýy kerek. Óıtkeni zergerler - ata-babadan qalǵan ulttyq murany saqtaýshy jandar», - dedi qolóner sheberi.