Qolma-qol aqshamen tólem jasaıtyn qazaqstandyqtar sany edáýir azaıdy

ALMATY. QazAqparat - Elimizde qolma-qol aqshasyz jasalatyn tólemderdiń basym bóligi ınternet nemese mobıldi qosymsha arqyly júzege asyrylady, dep habarlaıdy QazAqparat tilshisi Ranking basylymyna silteme jasap.

Qazaqstandyqtar qolma-qol aqsha jumsaýdy barynsha azaıtyp otyr. Mamyr aıynda kartochkalyq tólem 839,7 mlrd teńgege jetken, bul - barlyq kartochkalyq operatsııalardyń 40,1%-yn quraıdy. Osydan bir jyl buryn bul kórsetkish 26,4% bolatyn.

Qolma-qol aqshasyz tólemder tsıfrlandyrý men ınternet qyzmetteriniń tıimdi ári yńǵaıly ekenin kórsetedi. Sáýir aıynyń qorytyndysy boıynsha, ınternet jáne mobıldi qosymsha arqyly 533,3 mlrd teńge tólem jasalyp, bul - barlyq qolma-qol aqshasyz tólemniń 63,5%. 2018 jyly qolma-qol aqshasyz tólemder 50,7%-dy qurasa, 2015 jyly nebary 9,1% bolǵan.

Elimizde kartochkalyq júıe qarqyndy damyp keledi. Mamyr aıynda 13,3 mln belsendi kartochka bar ekeni anyqtaldy. Onyń kólemi br jyl ishinde 1 mln-ǵa artqan. Al 2015 jyly kratochka sany 7,1 mln bolǵan. Negizgi úlesti debettik kartalar qurap otyr - 10,1 mln.

1 mamyrdaǵy jaǵdaı boıynsha, elimizdegi 28 banktiń 22-si tólem kartochkalaryn shyǵarǵan. Sondaı-aq, ulttyq poshta operatory bar.

Alma Muqanova