Kollektorlyq agenttikterdiń boryshty zańsyz qaıtarý shemasy áshkerelendi - prokýratýra

NUR-SULTAN. QazAqparat - Azamattardyń ótinishteri jıileýine baılanysty prokýratýra organdary jeke sot oryndaýshylarynyń qyzmetine tekserý júrgizdi, sondaı-aq kollektorlardyń qyzmetine taldaý jasady, dep habarlaıdy QazAqparat tilshisi.

QR Bas prokýratýrasynyń baspasóz qyzmeti keltirgen derekterge saı, t ekserý jáne taldaý nátıjeleri boıynsha kollektorlyq agenttikterdiń JSO-men birlesip boryshtardy zańsyz óndirip alý shemasy bolǵany anyqtaldy.

Kollektorlar ózderiniń úlestes tulǵalaryna jeke sot oryndaýshylarynyń lıtsenzııasyn alyp otyrǵan.

Nátıjesinde olar arqyly bereshekti óndirip alý úshin JSO aqparattyq bazasyna (atqarýshylyq is júrgizý organdarynyń avtomattandyrylǵan aqparattyq júıesine) jáne shekteýsiz quqyqtyq tetikterge (múlikke tyıym salý jáne satý, shyǵýǵa shekteý qoıý, banktik shottarǵa qol jetkizý jáne basqalary) qol jetkizgen.

Sonymen qatar, sot oryndaýshylarynyń bazasy memlekettik aqparattyq júıe bolyp tabylady, onda JSO barlyq atqarýshylyq áreketterdi jasaıdy. Onda taraptardyń jeke derekteri bar, oǵan bógde adamdardyń kirýine tyıym salynǵan.

Tek Almaty qalasynda «ózderiniń» JSO ETsQ kiltterin paıdalana otyryp, kollektorlar sot oryndaýshylar bazasyna 200 myńnan astam ret kirip, onda boryshkerler týraly málimetter jınaǵan. Mundaı ádisterdi Almaty qalasynyń 35 kollektorlyq agenttigi qoldanǵan.

JSO-ǵa berilgen aıryqsha quqyqtardy paıdalaný múmkindigin bergeni úshin josyqsyz sot oryndaýshylary aı saıyn 250-300 myń teńge kóleminde syıaqy alyp otyrǵan.

Tekserý qorytyndysyna sáıkes Bas prokýratýranyń usynysy boıynsha Respýblıkalyq JSO palatasynan 18 sot oryndaýshysy shyǵaryldy.

Atalǵan sannan 2 JSO lıtsenzııalary kúshin joıdy, al 1 lıtsenzııa toqtatyldy, qalǵandary boıynsha talap qoıý jumystary jalǵasýda.

Júıelik ákimshi olardyń AІO AAJ aqparattyq bazasyna kirýin buǵattady.