Kollektorlar óz ókilettikterin asyra paıdalanǵany úshin qylmystyq jaýapkershilikke tartylýy múmkin

ASTANA. QazAqparat – Kollektorlyq agenttik qyzmetkerleri óz ókilettikterin asyra paıdalanǵany úshin qylmystyq jaýapkershilikke tartylýy múmkin. Ádilet mınıstrligi ázirlegen «Qazaqstan Respýblıkasynyń keıbir zańnamalyq aktilerine Qylmystyq, Qylmystyq-protsestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» Zań jobasynda osyndaı túzetý kózdelgen, dep habarlaıdy QazAqparat tilshisi.

Zań jobasyn Májilis depýtattaryna tanystyrǵan vıtse-mınıstr Alma Muqanova mundaı túzetýdiń ne úshin qajettigin túsindirdi.

«Qylmystyq kodekste kollektorlyq agenttik qyzmetkeriniń óz ókilettikterin asyra paıdalanǵany, qaryzdardy óndirip alýdyń zańsyz ádisterin qoldanǵany, qarjylyq qyzmetterdi tutynýshylardyń quqyqtaryn buzǵany jáne t.b. úshin jaýapkershiligin kózdeıtin arnaıy bap joq.

Bul rette Qylmystyq kodekstiń 214-shi jáne 223-baptary kollektorlardyń tek tirkeýsiz kollektorlyq qyzmetpen aınalysqany úshin, sol sııaqty eger bul áreketter azamatqa, uıymǵa nemese memleketke iri zalal keltirse ne iri mólsherde tabys tabýmen ushtassa, sondaı-aq kollektorlyq qyzmettiń qupııasyn jarııa etkeni úshin ǵana jaýaptylyqqa ákep soǵady.

Óz kezeginde, kollektorlyq agenttik qyzmetkeriniń óz ókilettikterin óz qyzmetiniń mindetterine qaıshy jáne ózi nemese basqa adamdar úshin paıda men artyqshylyqtar alý maqsatynda paıdalanýy qoǵamǵa qaýipti is-áreketter retinde baǵalanýy kerek», - dedi Alma Muqanova.

Osy jaıttardy eskergen mınıstrlik mamandary men zańgerler kollektorlyq agenttikter qyzmetkerleriniń óz ókilettikterin asyra paıdalanǵany jáne asyra paıdalanǵany úshin is-áreketterin qylmystyq jaýapkershilikke tartýdy usynyp otyr.

«Bul shara zańdyq saýatsyzdyqqa baılanysty kollektorlyq agenttikterdiń josyqsyz qyzmetkerleriniń qysymyna jáne aıla-sharǵysyna ushyraýy múmkin azamattardyń quqyqtary men múddelerin qorǵaýdy qamtamasyz etýge múmkindik beredi», - dedi Ádilet mınıstriniń orynbasary.