Kollektordaǵy apattan keıin Oral qalasy aýdandaryna sý berildi
«Batys sý arnasy» JShS dırektorynyń birinshi orynbasary Salaýat Aıbatovtyń aıtýynsha, keshe keshkisin qalanyń 4, 5, 6, 7, 9, «Qurylysshy» jáne «Soltústik-Shyǵys» shaǵynaýdandaryna sý berý qamtamasyz etildi.
Buǵan deıin M.Sholohov kóshesindegi kollektordaǵy apatty jaǵdaıǵa baılanysty sý sol aýdandardaǵy turǵyndarǵa eki mezgil berilip kelgen edi. Qazir ýaqytsha kollektor salynyp, iske qosyldy.
«Batys sý arnasy» JShS qyzmetkerleri úgitilip, shirip ketken 64 metr qubyrdy qazyp aldy. Ornyna jańadan qubyr satyp alyndy. Endi merdiger mekeme sol qubyrdy ornatý jumystaryna kirisetin bolady.
Apatqa baılanysty shyǵyndy esepteý úshin Oral qalasy ákimdigi janynan arnaıy komıssııa qurylyp, jumys jasaýda.
Eske sala keteıik, kollektordaǵy 30 sáýir kúngi apat saldarynan Oral qalasynyń teń jartysy derlik sýsyz qalǵanyn, sodan keıin apatty joıý jumystary jalǵasyp jatqanyn jazǵan bolatynbyz.
foto:news-factor.ru