Kolledjderdiń 5 myńǵa jýyq oqytýshysy iri kásiporyndarda taǵylymdamadan ótedi
Mınıstrlik kolledj oqytýshylarynyń bilim berý protsesine engizilip jatqan oqytý ádistemeleri men jańa tehnologııalardy ıgerýi aýdıtorııalarda emes, salalyq kásiporyndar men mekemeler bazasynda ótýi úshin kelissózder júrgizip, kelisimderge qol jetkizdi.
ıAǵnı, eger buryn pedagogter biliktiligin teorııa júzinde arttyrsa, endigi kezekte praktıkalyq bilim sapasyn arttyrýǵa basymdyq beriledi.
Osy jyldyń sońyna deıin elimizdiń túrli óńirlerinen 5 myńǵa jýyq kolledj oqytýshysy iri kásiporyndarda oqýdan ótedi.
«Mınıstrlik qazir kolledjde oqyp júrgen stýdentterdiń bolashaqta jumysqa ornalasýy úshin qajetti praktıkalyq bilim alýyna úlken kóńil bóledi. Alǵa qoıylǵan maqsatqa jetý úshin biz qazir pedagogterdi óndiris oryndarynda oqytamyz. Jaqyn arada biz oqytý sapasyndaǵy oń ózgeristerdi kóre alamyz dep oılaımyn. Oqytýshylar «Atameken» Ulttyq Kásipkerler palatasy usynǵan kásiporyndar bazasynda nemese kolledjderdiń ózderi yntymaqtastyq ornatqan jumys berýshilerdiń uıymdarynda taǵylymdamadan ótip jatyr. Sondaı-aq pedagogter kolledj janyndaǵy quzyrettilik ortalyqtarynda biliktiligin arttyra alady. Bul ortalyqtar «Jas maman» jobasy aıasynda qurylǵan jáne olardyń barlyǵy qajetti zamanaýı jabdyqtarmen jabdyqtalǵan», — dedi QR BǴM Tehnıkalyq jáne kásiptik bilim departamentiniń dırektory Nasymjan Ospanova.
Kásiporyndarda taǵylymdamadan ótken kezde pedagogter praktıkalyq quzyrettilikterin jetildirip, jumys berýshilermen birlese kolledj túlekteriniń qandaı daǵdylardy meńgerý kerektigin anyqtaıdy. Sodan keıin, aýdıtorııalyq oqytý kezinde pedagogter eńbek naryǵynyń qajettilikteri men jumys berýshilerdiń suranystaryn eskere otyryp, bilim berý baǵdarlamalaryna ózgerister engize alady.
Aıta keteıik, oqý jylynyń basynan bastap tehnıkalyq jáne kásiptik bilim berý uıymdaryna akademııalyq derbestik berildi. Endi qazaqstandyq kolledjder jumys berýshilermen birlesip, bilim berý baǵdarlamalarynyń mazmuny men oqý merzimderin ózderi aıqyndaıdy.