Kolledjderde maman daıarlaýǵa bólinetin qarajat 2 ese ulǵaıady

<p>Elimizde kolledjderde maman daıarlaýǵa bólinetin jan basyna shaqqandaǵy qarjylandyrý normatıvin eki ese ulǵaıtý jumystary pysyqtalyp jatyr. Bul týraly Úkimet otyrysynda Oqý-aǵartý mınıstri Ǵanı Beısembaev aıtty, dep habarlaıdy Kazinform agenttiginiń tilshisi.</p>

«Mınıstrlik tehnıkalyq jáne kásiptik bilim júıesinde kadr daıarlaýdy jańa sapalyq deńgeıge kóterý úshin birneshe qadam belgiledi. Birinshiden, kolledj qyzmetiniń baǵyttaryna taldaý jasalyndy. Óńirdiń mamandanýy men kolledjderde kadrlar daıarlaýdaǵy dısproportsııa anyqtaldy. Osyǵan oraı, kolledjderdi beıindeý jumystary júrgizilip, kadrlardy daıarlaý suranysqa ıe mamandyqtar aıasynda júzege asyryla bastady», - dedi mınıstr.

Onyń atap ótýinshe, oqytýdaǵy tıimdi ozyq ádistemeler men tásilderdi taratý maqsatynda lokomotıv-kolledjder aıqyndalyp, zamanaýı kolledjder bazasynda IT-habtar ashý jumystary júrip jatyr. 

«Bilim alýshylardyń kásipkerlik daǵdylaryn damytý úshin stýdenttik bıznes-ınkýbatorlar qurylýda. Kolledjder janynan shaǵyn kásiporyndar ashý arqyly stýdentterdi praktıkaǵa baǵyttaý jumystaryn kúsheıtemiz. Sondaı-aq, kolledjderdegi mamandy daıarlaýǵa bólinetin jan basyna shaqqandaǵy qarjylandyrý normatıvin eki ese ulǵaıtý jumysy pysyqtalyp jatyr. Eńbek naryǵyna sapaly kadrlar daıarlaý máselesi Oqý-aǵartý mınıstrliginiń únemi nazarynda», - dedi Ǵanı Beısembaev.