Kolledjderdi iri bızneske senimgerlik basqarýǵa berý tetigi qaıta qaralady
«Erekshe atap ótkim keletini, qazirdiń ózinde halyqaralyq standarttar engizilgen elimizde alty kolledj bar. Olardyń túlekteri mamandyqtar boıynsha sertıfıkattaýdan ótip jatyr. Máselen, Atyraýdaǵy APEC PetroTechnic kolledjinde munaı-gaz salasy boıynsha, Taldyqorǵan joǵary polıtehnıkalyq kolledjinde qurylys salasynda bilim berýdiń halyqaralyq standarty engizilgen. Bul kolledjdiń sertıfıkattalǵan túlekteri bizde de, shetelde de úlken suranysqa ıe. Bıyl, jyl sońyna deıin 5 kolledjdi akkredıtteýden ótkizý josparlanyp otyr. 2030 jylǵa qaraı elimizdegi 30 kolledj halyqaralyq salalyq akkredıtteýden ótedi. Bul óz kezeginde álemdik standarttar boıynsha mamandar daıarlaýǵa múmkindik beredi», - dedi Ǵ. Beısembaev.
Sonymen qatar mınıstr tehnıkalyq jáne kásiptik bilim men joǵary oqý oryndary baǵdarlamalarynyń sabaqtastyǵy qamtamasyz etiletinin aıtty.
Budan bólek ol pedagogterdiń áleýetin kóterý taqyrybyna toqtaldy. Osyǵan oraı pedagogter úshin Ekonomıkalyq yntymaqtastyq jáne damý uıymy (EYDU) elderiniń úzdik kásiptik bilim berý uıymdarynda halyqaralyq tájirıbeden ótý múmkindigi keńeıtiledi. Munymen qosa, qysqa merzimdi kýrstardy uıymdastyrý arqyly salanyń úzdik mamandaryn tehnıkalyq jáne kásiptik bilim qyzmetine tartý josparlanǵan. Pedagogterdiń kásiporyndarda taǵylymdamadan ótýin engizý jáne ónerkásipten mamandardy tartý kózdelgen.
«Túlekterdi sertıfıkattaýǵa toqtalsaq, qazir mindetti sertıfıkattaý retteletin mamandyqtar boıynsha júzege asyrylady. Bul sertıfıkattaý ýákiletti organdarmen uıymdastyrylady jáne rettelmeıtin mamandyqtar boıynsha táýelsiz sertıfıkattaý júrgiziledi. Transformatsııa aıasynda barlyq mamandyq túrleri úshin táýelsiz sertıfıkattaý júıesin qurý qarastyrylǵan. Bul jaǵdaıda biz tek túlektiń bilimi men daǵdylaryn baǵalap qana qoımaı, bilim berý uıymdarynyń ózderin de baǵalaıtyn bolamyz», - dedi vedomstvo basshysy.
Onyń sózine qaraǵanda, bıznespen yntymaqtastyq jalǵasyp, kolledjderdi salalyq kóshbasshylar birigetin ındýstrııalyq alańǵa aınaldyrý kózdelgen. Infraqurylymdy damytýdy, bilim uıymynyń profıli men kontıngentin saqtaýdy jáne ınvestıtsııalaýdy mindetteı otyryp, kolledjderdi iri jáne orta bızneske senimgerlik basqarýǵa berý tetigi qaıta qaralatyn bolady.
«Senimgerlik basqarýǵa berýdiń tıimdi mehanızminiń biri retinde Qostanaı oblysyndaǵy «ALLUR» kompanııasynyń óńirdegi avtokólik kolledjine sheftik qamqorlyq aıasyndaǵy nusqasyn qarastyrýǵa bolady. Bul mehanızmniń erekshelikterine toqtalsaq, materıaldyq tehnıkalyq bazany nyǵaıtady, ınnovatsııalyq óndiristik tehnologııalarmen qamtylǵan praktıka bazalaryna turaqty qol jetkizedi, bilim berý protsesin jaqsartady, túlekterdi jumysqa ornalastyrý múmkindigin keńeıtedi. Nátıjesinde, senimgerlik basqarý kolledjderdi eń sońǵy zamanaýı qurylǵylarmen jabdyqtap, stýdentterdi kásiporyndar ótinimimen maqsatty memlekettik tapsyrys aıasynda oqytý kózdelip otyr», - dedi ol.