Kolledj stýdentteriniń basym bóligi tehnıkalyq mamandyqtarda oqıdy

ASTANA. QazAqparat – Kásiporyndar kadrlardy daıarlaý baǵytynda 400-den astam kolledjben shart bekitti. Bul týraly elordada ótip jatqan respýblıkalyq tamyz keńesinde atalǵan mınıstrliktiń basshysy Ǵanı Beısembaev aıtty, dep habarlaıdy QazAqparat tilshisi.

«Tehnıkalyq jáne kásiptik bilim berý eńbek naryǵynda básekege qabiletti mamandardy daıarlaýda negizgi fýnktsııany atqaryp otyr. Ótken oqý jylynda 517,3 myń jas 772 kolledjde oqydy. Memlekettik tapsyrystyń 60 paıyzy tehnıkalyq mamandyqtarǵa (metallýrgııa, mashına jasaý, IT, qurylys, kólik jáne t.b.) qaıta baǵdarlanǵan. Eki jyl qatarynan jumysqa ornalasý mindettemesimen, maqsatty tapsyrys boıynsha 10 myń stýdent oqýǵa qabyldanyp keledi. Kolledjder akademııalyq derbestik aıasynda bilim berý baǵdarlamalarynyń mazmunyn, básekege qabiletti mamandardy daıarlaý úshin oqytý merzimderin aıqyndaı aldy», - dedi Ǵ. Beısembaev.

Onyń aıtýynsha, kolledjderdiń materıaldyq-tehnıkalyq bazasyn jańartý jumystary jalǵasyp keledi. Kásiporyndardyń kolledjderge qamqorlyǵy aıasynda 498 kásiporyn kadrlardy daıarlaýǵa, kolledjderdi basqarýǵa, zerthana qurylǵylarymen jabdyqtaýǵa, stýdentterdi óndiristik praktıkaǵa, al pedagogtardy taǵylymdamaǵa qabyldaýǵa qatysý úshin 410 kolledjben shart jáne memorandým bekitti.

«Kolledj stýdentterin yntalandyrý maqsatynda bıylǵy qyrkúıekten bastap stıpendııany kezeń–kezeńimen eki esege ulǵaıtý kózdelgen. «WorldSkills Kazakhstan 2022» VII Respýblıkalyq kásibı sheberlik chempıonatynyń qorytyndysy boıynsha kolledj stýdentteri 34 altyn, 38 kúmis jáne 38 qola medal jeńip aldy. Chempıonatqa qatysqan taǵy 144 stýdent úzdik medalmen marapattaldy», - dedi mınıstr.

Budan buryn habarlanǵandaı, búgingi tamyz keńesinde jańa 2023-2024 oqý jyly 25 mamyrda aıaqtalatyny málim boldy.