Kolledj stýdentterine 1 kýrstan bastap jumys isteýine ruqsat berilmek

ASTANA. QazAqparat – Dýaldy bilim beretin kolledjderdiń stýdentterine birinshi jáne ekinshi kýrstan bastap mamandyǵy boıynsha jumys isteýine ruqsat etilýi múmkin. Bul týraly ashyq talqyǵa shyǵarylǵan Oqý-aǵartý mınıstrliginiń buıryǵynda kórsteligen, dep habarlaıdy QazAqparat tilshisi.

«Kásiporynnyń ótinimi boıynsha tehnıkalyq jáne kásiptik, orta bilimnen keıingi bilim berý uıymdarynda negizgi orta bilim berý bazasynda oqýǵa túsken talapkerler úshin dýaldy oqytý birinshi nemese ekinshi kýrstan bastalady. Dýaldy oqytý uıymdastyrylǵan jaǵdaıda ekinshi kýrstan bastap qalǵan oqý kýrstaryna dýaldy oqytý talaptaryna sáıkes bilim berý baǵdarlamasy qaıta qaralady», - dep jazylǵan jańa redaktsııada.

Qoldanystaǵy talap boıynsha stýdentter dýaldy oqytý týraly shartyna sáıkes eńbekke aralasatyn. Jalpy dýaldy bilim berý – bul kolledjdegi teorııalyq bilim men jumys oryndary arqyly kásibı tájirıbeni ushtastyrýǵa baǵyttalǵan júıe. Endi usynylyp otyrǵan ózgeris kúshine ense, onda stýdentter salasyna saı, shart jasasqan kásiporyndarda 1 nemese 2-kýrstardan bastap eńbek etip, tájirıbe jınaqtaı alady.

Sonymen qatar, buıyryqqa qosymsha dýaldy oqytýdy engizý úshin usynylatyn tehnıkalyq jáne kásiptik bilim berý mamandyqtarynyń tizbesi usynylǵan. Olarmen myna siltemege ótip, tanysýǵa bolady.

Qujatty ashyq talqylaý 27 jeltoqsanǵa deıin jalǵasady.