Kolledj ozattaryn JOO-ǵa emtıhansyz qabyldaý tájirıbesin qaıtarý kerek – Tamara Dúısenova

<p>ASTANA. KAZINFORM &ndash; Bilikti kadrlar tek joǵary oqý oryndarynda ǵana emes, tehnıkalyq jáne kásiptik bilim berý uıymdarynda da daıyndalýy kerek. Bul týraly QR Premer-Mınıstriniń orynbasary Tamara Dúısenova &laquo;Digital Kazakhstan: zamanaýı bilim berý&raquo; respýblıkalyq tamyz sammıtinde aıtty.</p>

«Bilikti kadrlar tek joǵary oqý oryndarynda ǵana emes, tehnıkalyq jáne kásiptik bilim berý uıymdarda da daıyndalýy kerek. Ókinishke oraı, bul bilim berý júıesiniń eń osal býyny bolyp qalýda. Dúnıejúzilik ekonomıkalyq forýmnyń 2019 jylǵy málimetinshe, biz álemniń 141 eli arasynda túlekterdiń daǵdylary boıynsha 95-shi orynda turmyz. Prezıdent tapsyrmasymen Úkimet barlyq TjKB uıymdaryn túgendeýdi aıaqtady jáne profıldeýdi júrgizýde. Kelesi kezeń – joǵary oqý oryndarynda josparlanǵan ózgeristermen sabaqtastyqty qamtamasyz etýge baǵyttalǵan transformatsııa bolýy kerek», - dedi Tamara Dúısenova. 

Sondaı-aq, vıtse-premer bilim berýdiń halyqaralyq salalyq standarttary engiziletin tirek kolledjder tizbesin aıqyndaý qajettigin aıtty. 

«Budan ári olardyń bazasynda basqa TjKB túlekterin oqytýdyń jáne sertıfıkattaýdyń jańa baǵdarlamalaryn transfertteý úshin kadrlardy ozyq daıarlaý ortalyqtaryn qurý qajet. Mundaı mysaldar qazirdiń ózinde bar. Mysaly, Atyraý APEC PetroTechnic kolledjinde munaı-gaz salasynda bilim berýdiń 3 halyqaralyq standarty engizildi (elektr energetıkasy, burǵylaý kezinde uńǵymany basqarý, munaı óńdeý túrleri boıynsha tehnolog). Bul kolledjdiń sertıfıkattalǵan túlekteri bizde de, shetelde de suranysqa ıe», - dedi T. Dúısenova. 

Sondaı-aq, spıker joǵary oqý oryndary men kolledjderdiń bilim berý baǵdarlamalary arasyndaǵy sabaqtastyqty qamtamasyz etý qajet ekenin aıtty. 

«Mysaly buǵan tartylǵan bedeldi joǵary oqý oryndary joǵary deńgeıdegi ınjenerlerdi daıarlasa, onda kolledjer tıisinshe tehnıktermen, tehnologtarmen, jańa býyn mehanıkterimen JOO-ny tolyqtyrýǵa tıis. Munda buryn tehnıkýmdardy úzdik aıaqtaǵan tulǵalar JOO-nyń úshinshi kýrsyna emtıhansyz qabyldanǵanyn eske salǵym keledi. Bul tájirıbe mamandardyń biliktiligine qoıylatyn jańa talaptardy eskere otyryp, jańartylýy tıis», - dedi Tamara Dúısenova.

Aıta keteıik, elordada «Digital Kazakhstan: zamanaýı bilim berý» atty Tamyz keńesi ótti. Oǵan 500 myńnan astam bilim berý qyzmetkeri onlaın jáne offlaın qatysty.