Kolledj bitirgenderdi nege jumysqa kóp ala bermeıdi

<p>TARAZ. KAZINFORM &ndash; Búginde Jambyl oblysyndaǵy 42 tehnıkalyq jáne kásiptik bilim mekemelerinde 27 myńnan asa jastar 103 mamandyq boıynsha bilim alyp jatyr. Onyń 70 paıyzy memlekettik tapsyrys negizinde oqıdy.</p>

Sondaı-aq 10 memlekettik kolledjde 4 aýylsharýashylyq mamandyqtary boıynsha mamandar daıarlanyp jatyr. Jasyratyny joq, memlekettik tapsyrystyń basym bóligi aýylsharýashylyǵy mamandyqtaryna berilgen.

2023 jyly 287 oryn bólinse, 2024 jyly bul kórsetkish 303-ge jetti. Osy 10 kolledjde dýaldy oqytý júıesi engizilip, 1214 stýdent qamtylyp, 152 sharýa qojalyqtarymen 1214 kelisim-sharttar jasalǵan.

Bıylǵy oqý jylynda kolledj dıplomyn alǵan 3 533 túlektiń 480-i aýylsharýashylyq salasy boıynsha mamandar. Alaıda 480 túlektiń 144-i, ıaǵnı 30 paıyzy ǵana jumysqa ornalasqan.

Taǵy 18 túlek joǵary oqý oryndaryna qabyldanypty.

– Iá, kolledj túlekterin turaqty jumys oryndarymen qamtý máselesi bar. Sondyqtan kásiporyn, jumys berýshilerge kepildendirilgen qajettilikti usyný mindettelse degen usynys bar. Kolledjdi bitirgen túlek jumys berýshi usynǵan qajettilikke saı jumysqa ornalasatyn bolsa durysedi. Buǵan qosa jumys berýshilerdiń tarapynan kolledj túlekterine zeınet aqy tóleý qory arqyly tıisti aýdarymdar júıeli túrde jiberilse. Óıtkeni qyzmet kórsetý salasy boıynsha restoran, mashına jóndeý, shashtaraz salondary qolma-qol tólem jasaýmen qutylady. Sondaı-aq kolledjderdiń aqyly qyzmet kórsetýin jandandyrý maqsatynda aýdan ákimdikteri barynsha qolaıly jaǵdaılar jasap, aýylsharýashylyq maqsatynda jer telimderin, iri saýda ortalyqtarynan oryndar bólse durys bolar edi, – deıdi Jambyl oblys ákimdigi bilim basqarmasynyń basshysy Raýan Sadyrqulov. 

Taǵy bir aıta keterligi, búginde oblystaǵy 9 memlekettik kolledjdiń ıeliginde 894 gektar aýylsharýashylyq maqsatyndaǵy jer telimi bar. Bul egistik jerlerdiń 70 paıyzy ıgerilgen. Jáne 10 kolledjde 73 tehnıka, 57 qosalqy tehnıka jumys isteıdi. Tehnıkanyń 28-i 2020 jyly «Jas maman» jobasy aıasynda alynǵan.