Kóliktiń aldyna túsip 36 km júgirgen qutqarýshylar qarııany qalaı qutqardy
- Muǵaljarlyq órt sóndirýshilerdiń eńbegi men erligin qazir el bildi. Siz sol №8 órt sóndirý bóliminiń qaraýyl bastyǵysyz. Bul salany tańdaýǵa ne túrtki boldy?
- Ózim osy aýdannyń týmasymyn. Mektep bitirgen soń M.Ǵabdýllın atyndaǵy azamattyq qorǵaý akademııasyna órt sóndirýshi mamandyǵyna oqýǵa tústim. 2021 jyly qolǵa dıplom alyp, Qandyaǵash qalasyndaǵy №8 órt sóndirý bólimine qaraýyl bastyǵy bop qyzmetke ornalastym. Sodan beri úsh jyl ótti. Turaqty eńbek etip kelemiz.
- Óńirde birneshe kún boıy boran bolyp, qatynas qıyndady. Ásireseǵ sársenbi kúni aqtútek borannan eshteńe kórinbeı qalyp, túrli aqparat tarady. Sonyń eń áserlisi – qutqarýshylardyń eńbegi, tipti erligi dep aıtýǵa bolady. Sol kúngi oqıǵa týraly taǵy bir márte aıtyp berseńiz.
- Habarlama 112 nómirine tústi. Aýa raıy kúrt ózgergende Basshıli aýylyna jol joq ekenin bildik. Sondyqtan «Trekol» kóligin shyǵarýǵa sheshim qabyldaǵan jaıymyz bar. Ári jolǵa birden 8 adam attandy. Jolaı adamdarǵa kómek qajet bolar dep te oıladyq. Basshıli aýylynan eki adam kólikke minetini týraly aldyn ala bilgen soń múmkindiginshe kóp qyzmetkerdi alyp shyqqan jón dep sanadyq. Bul 7 aqpan kúni saǵat 08:14-te boldy. Shamamen 11:40-ta Basshıli aýylyna jettik. Aýylǵa Aqtóbe-Atyraý trassasymen júretin bolǵan soń bárine daıyn bolý kerek. Kólik kezigip nemese trassadan túsip ketýimiz múmkin edi. Sol apattyń aldyn alý úshin kólik aldyna túsip, alma-kezek júrdik, keıde júgirdik. Ár shaqyrym saıyn almastyq, esh toqtamadyq. Boran uıytqyǵan kezde qıyn bolady, bas kótertpeıdi. Keı tusynda joldy qar basyp tastaǵan. Ondaı kezde kólik óz yńǵaıyn taýyp, buzyp-jaryp qozǵaldy. Kúrekpen de arshyǵan kez boldy.
- Basshıli aýylyna jetkende birden keri oraldyńyzdar ma?
- Bizdiń quramda qutqarýshylar men órt sóndirýshiler boldy, biraq dárigerler qarastyrylmady. Densaýlyǵy syr bergen áje buǵan deıin de Qandyaǵash qalasynda aýrýhanaǵa qaralyp júrgenin bildik. Sondyqtan bes mınýtta kólikke mingizip alyp, keri qozǵaldyq. Shamamen saǵat 14:00-de aýdan ortalyǵyna oralyp, naýqasty aýrýhanaǵa jetkizdik. Biz jol boıynda ári aýdan ortalyǵynda bolǵan soń ba, mundaı jaǵdaı jıi bolyp turady. Qaısybirin kórsetip, aıtyp otyramyz? Shynymdy aıtsam, vıdeoǵa túsip qalǵany osy.
- Jumysqa, kezekshilikke shyqqan kezde úıden daıyndalyp shyǵasyz ba?
- Biz kezekshilikpen jumys isteımiz. Ár kezekshi qaraýyl táýlik boıy jumys isteıdi. Sol táýlikte ne bolsa da soǵan daıyn júremiz. Kıim de, tehnıka da saqadaı saı. Órt, qutqarý, avarııalyq qutqarý, tabıǵı qubylysqa daıyn júremiz. Al shaqyrtý túskende qajet kómekti jol boıy talqylaımyz.
- №8 órt sóndirý bóliminde qansha adam eńbek etedi?
- Barlyǵy 30 adam órt sóndirýshi bolyp jumys isteıdi. Bizde tórt qaraýyl kezekshiligi bar. Ár qaraýylda 7 adam eńbek etedi. Eki bólimshe komandıri de bar. Bári birdeı jas maman emes, tájirıbeli qyzmetkerlerimiz de qatarymyzdan tabylady. Keshegi boranda Basshılidegi shaqyrtýǵa barǵan qyzmetkerler bir qaraýylda emes, birneshe qaraýylda eńbek etedi. Bir sózben aıtqanda aralas boldy. Bólimshede 7 tehnıka bar. Onyń úsheýi avtotsısterna, bir aýyr kólik jáne «Trekol» jol talǵamaıtyn kóligi men qutqarýǵa arnalǵan baspaldaqty kólik bar.
- Keshegi qadam kópshilikti tánti etti. Sizder qoldaýdy sezdińizder me?
- Bizdiń mindetimiz - qutqarý, órt sóndirý, kómektesý. Biz osy salany sanaly túrde tańdadyq. Qıyndyǵyn da bilemiz. Erlik emes, mindetimiz.
- Kómek kórsetken qarııadan habar bar ma? Densaýlyǵy qalaı?
- Biz erteńine habarlasyp, jaǵdaıyn bildik. Densaýlyǵy birqalypty, dárigerlerdiń qaraýynda eken. Iá, biz jıi alǵys alamyz, adamdar batasyn da beredi.
- Biz de rızashylyǵymyzdy bildiremiz, aman bolyńyz!
Eske salsaq, 7 aqpan kúni 73 jastaǵy qarııanyń densaýlyǵy syr berip, muǵaljarlyq qutqarýshylar jol talǵamaıtyn kólikke baǵdar berý úshin alma-kezek júgirip, 36 shaqyrymdy eńserdi.