Kóliktiń aldyna túsip 36 km júgirgen qutqarýshy: Búgingi marapattyń orny bólek

<p>AQTÓBE. KAZINFORM - Muǵaljar aýdandyq №8 órt sóndirý bóliminiń bólimshe komandıri Nurbolat Tájiǵulov búgin Raqymjan Qoshqarbaev atyndaǵy ІІІ dárejeli &laquo;Aıbyn&raquo; ordenimen marapattaldy. Ol &ndash; bıyl qysta kólik aldyna túsip 36 shaqyrym júgirgen 8 qutqarýshynyń biri.</p>

Nurbolat Tájiǵulov Aqtóbe oblysy Muǵaljar aýdany Qandyaǵash qalasynyń týmasy. Ol №5 orta mektepte oqyp, 2013 jyly ásker qataryna shaqyrylady. 2014 jyly Otan aldyndaǵy boryshyn ótip kelip, 2016 jyly №8 órt sóndirý bóliminde órt sóndirýshi bolyp jumys istedi. Qazir bólimshe komandıri.

«Árbir mezgildiń óz qıyn kezi bolady. Ásirese, qystaǵy boranda adam joǵalyp, kólikpen jolda qalyp qoıatyn jaǵdaılar kezigip turady. Medıtsınalyq kómek jete almaǵan kezde avarııalyq-qutqarý jumystaryna shyǵamyz. Al kóktemde sý kóterilip, jeke turǵyn úılerdi saqtaý jumysyna qatysamyz. Jaz aılarynda dala órtterin sóndirý jumystaryn júrgizemiz. Odan bólek turǵyn úılerde órt bolady. Onda basqa esiktiń qulyptalyp qalýy, úıde balalardyń qalyp qoıý deregi kezdesedi», - dedi Nurbolat Tájiǵulov.

Ol tórt aǵaıyndy. Apasy, aǵasy jáne inisi bar. Órt sóndirý-qutqarý jumystary salasyn tańdap, maqsatty túrde jumysqa turǵan maman qazir tájirıbeli, bilikti qyzmetker. Bıyl osy salany tańdaǵanyna 8 jyldan asty. Ol ózinen keıingi zamandastaryna da oılanbastan osy salany tańdaýǵa keńes beredi.

«Bul sala óte jaýapty, abyroıly, mártebeli jumystyń biri. Men qutqarýshy bolýǵa shaqyramyn. Búgingi marapattyń orny bólek. Jumys isteýge, alǵa qaraı qadam basýǵa úlken jiger berdi. Árkimniń basyna bermeıtin baq der edim. Eńbek baǵalanyp, mártebege, marapatqa ıe bolý úlken qýanysh. Buǵan deıin eki ret TJM alǵys zatyn aldym. Bul – meniń birinshi memlekettik nagradam», - dedi ol.

Eske salsaq, bıyl aqpan aıynda Aqtóbede qatty boran boldy. Sol kezde tótenshe jaǵdaılar qyzmetiniń bir top qyzmetkeri kólik aldynda 36 shaqyrym jaıaý júrip, qarııany aýdan ortalyǵyndaǵy aýrýhanaǵa jetkizdi. Kóp uzamaı borandy kúni shaqyrtýǵa jaıaý barǵan tótenshe jaǵdaılar bólimi qyzmetkerleriniń aty-jóni túgel belgili boldy: Muǵaljar aýdany №8 órt sóndirý ólimshe komandıri N.Tájiǵulov, bólimshe komandıri D.Shamakov, qaraýyl bastyǵy A.Álı, órt sóndirýshiler E.Marat, A.Qusaıynov jáne J.Sultamuratov, A.Saǵyndyq, A.Jalǵasov. Olar Qandyaǵash qalasynan Basshıli aýylyna jaıaý bardy.