Almatyda qazaq tiline ıntegratsııalanǵan mýltımedııalyq júıelerdi shyǵaratyn zaýyt ashyldy

<p>ASTANA. KAZINFORM - Almatyda Kazakhstan Mobility Engineering qazaq tili ıntegratsııalanǵan avtomokólikterge arnalǵan mýltımedııalyq júıeler shyǵaratyn jańa zaýyt ashyldy. Kásiporyn Ońtústik Koreıalyq Motrex Co Ltd seriktesiniń tehnologııasy boıynsha jumys isteıdi. Bul týraly Úkimettiń baspasóz qyzmeti habarlady.</p>

Jańa óndiristi iske qosý Memleket basshysynyń «Ádiletti Qazaqstan: Zań men tártip, ekonomıkalyq ósim, qoǵamdyq optımızm» atty Joldaýynda belgilengen maqsattarǵa jaýap beredi. Ónerkásiptik áleýetti tolyqqandy ashý úshin otandyq shıkizat pen komponentterdi paıdalanýdy qosa alǵanda, júıeli tásil qajet. Avtoónerkásiptiń ósýi Qazaqstannyń ónerkásiptik saıasatynyń negizgi baǵyttarynyń birine aınalýda, sondyqtan óndiristik úderisterdi lokalızatsııalaý men tereńdetýdi birlesip damytý mańyzdy. Zaýytty iske qosý — joǵary deńgeıde qaıta óńdeýdi ıgerý jáne iri ónerkásiptik nysandardyń aınalasynda irgeles óndiristerdi qurý qadamdarynyń biri. Kásiporyn «Astana Motors» kompanııasynyń quramyna kiredi.

«Mýltımedııalyq júıeler — bul joǵary dáldiktegi óndiris, ol tsıfrlyq tehnologııalar salasyndaǵy, ınjenerlik saladaǵy birinshi dárejeli mamandardyń quzyretin talap etedi. Bizdiń basty maqsatymyz — lokalızatsııanyń joǵary úlesi bar óndiris tsıklin qurý. Biz otandyq shıkizat pen komponentterdi barynsha paıdalanatyn bolamyz. Sondyqtan Kazakhstan Mobility Engineering elimiz úshin mańyzdy mánge ıe», — dep atap ótti ónerkásip jáne qurylys mınıstri Qanat Sharlapaev zaýyttyń ashylý saltanatynda.

Otandyq óndirýshilerdi qoldaý sheńberinde Úkimet keshendi sharalardy iske asyrýda. Avtokólik jasaýda Memleket basshysynyń tapsyrmasyna sáıkes klasterlik óndiristi damytý boıynsha jumys júrgizilýde, bul salanyń turaqty ósýine jáne syrtqy naryqtardaǵy ónimniń básekege qabilettiligin arttyrýǵa yqpal etetin bolady. Budan basqa, bıyl aýyl sharýashylyǵy mashınalaryn jasaýda ımporttyq analogtardy sýbsıdııalaý alynyp tastaldy, tehnıka lızınginiń paıyzdyq mólsherlemesin sýbsıdııalaý kezinde saralanǵan tásil kózdelgen — otandyq ónim úshin tómen. Temirjol mashınasyn jasaý sektorynda qoljetimdi lızıngtik qarjylandyrý tetigi iske qosyldy, sonyń arqasynda 2024 jyly óndiris 1,5 esege ulǵaıdy.

Kazakhstan Mobility Engineering zaýyty Almatynyń ındýstrıaldy aımaǵynda ornalasqan. Kásiporyn 100 myń sharshy metr aýmaqta avtokólik bólshekterin shyǵaratyn iri tehnoparktiń quramyna enedi. Atalǵan joba óndiristi lokalızatsııalaýǵa jáne qazaqstandyq avtoónerkásipti qoldaýǵa baǵyttalǵan. Sondaı-aq Almaty ındýstrıaldy aımaǵy aýmaǵynda avtokreslolar, avtokólikterge arnalǵan rezeńke jáne plastık buıymdaryn shyǵaratyn zaýyttar men logıstıkalyq habty iske qosý josparlanyp otyr. Barlyq tehnoparktiń tehnıkalyq óndiristik qýaty jylyna shamamen 100 myń jıyntyqty quraıdy. Klaster aýmaǵynda 90-nan astam maman jumys isteıdi, al búkil óndiristik keshen qyzmetkerleriniń shtaty shamamen 400 adamǵa jetedi dep kútilýde.