Kólik jýý beketterine sýdy únemdeý qurylǵysyn ornatý mindettelip jatyr
«Kólik jýý beketterinen sýdy qaıta paıdalanýǵa arnalǵan qurylǵy ornatýdy talap etip jatyr. Qurylǵyny ornatý týraly 2017 jyldan bastap aıtylyp keledi, bıyl taǵy kólik jýý beketteriniń ıelerine qaıta habarlama jiberdik. Búginde elordada 50 kólik jýý beketi arnaıy qurylǵyny qoıǵan, taǵy 100 shaqty kólik jýý beketi bizge 1-1,5 jyl ýaqyt ber dep otyr. Habarlandyrýǵa sáıkes qurylǵyny bir aıdyń ishinde ornatý kerek, árıne ornatpaǵan jaǵdaıda sýdy birden ajyratyp tastamaımyz. Kólik jýý beketteriniń ıeleri jaǵdaıyn aıtyp keledi, biz qosymsha ýaqyt beremiz», - dedi «Astana sý arnasy» mekemesi bas dırektorynyń orynbasary Qanat Nurmaǵambetov.
Onyń aıtýynsha, sýdy únemdep, qaıta paıdalanýǵa arnalǵan qurylǵynyń quny ártúrli, shamamen 800 myń teńgeden bastalady.
«1 jeńil kólikti jýýǵa 300 lıtr sý ketedi, al qurylǵynyń kómegimen 200 lıtr sýdy qaıta qoldanýǵa bolady. Qurylǵyny ornatpaǵan kólik jýý beket ıelerine aıyppul basqa da jaza qoldanylmaıdy. Bizdiń maqsat – sýdy únemdeýge shaqyrý», - deıdi ol.
Búginde elorda aýmaǵynda Astana sý arnasy mekemesinde resmı tirkelgen 272 kólik jýý beketi bar.
«Birinshiden, aınalymdaǵy sýmen jabdyqtaý júıelerin ornatý aıtarlyqtaı ınvestıtsııa men ýaqytty qajet etedi. Kóptegen avtokólik jýý beketi ıeleriniń bul talapty oryndaýǵa jetkilikti qarajaty joq. Ekinshiden, sýmen jabdyqtaý júıelerin tehnıkalyq ornatý jáne baptaý bilikti mamandardyń qatysýyn talap etetin kúrdeli protsess. Talaptardy oryndaý úshin aıtarlyqtaı ýaqyt kerek», – deıdi Astana qalasy Kásipkerler palatasynyń dırektory Qanat Alın.
Óz kezeginde kólik jýýmen aınalysatyn kásip ıeleri atalǵan qurylǵynyń qymbat ekenin jáne ýaqyt berýdi surap otyr.
«Aldymen qurylǵyny qoıý úshin ýaqyt jáne qarajat kerek. Iá, birneshe kólik jýý beketteriniń ıesi ornatqan shyǵar, biraq olar 1-1,5 mln teńgeniń arzan qurylǵysy, sapaly qurylǵy shamamen 10 mln teńge turady, al bizde ol kólemde qarjy joq. Bizge ýaqyt bersin, sýbsıdııa jaǵyn qarastyrsyn, múmkin qurylǵyny ózderi qoıyp berer. Men kólik jýý beketin 10 jyl boıy jalǵa alyp kelemin, arendanyń baǵasy, jumysshylardyń aılyǵy, salyq basqa da shyǵyndar bar. Men sýdy únemdeý qurylǵysyn ornatýǵa qarsy emespin, tek ýaqyt kerek, sebebi onyń somasy qomaqty», - deıdi astanalyq kásipker Tolqyn Kópeeva.