Kólik salasyndaǵy tehnıkalyq mamandyqtarǵa qosymsha granttar bólinýi múmkin
«Azııa men Eýropa arasynda Qazaqstan arqyly ótetin tranzıttik tasymal kólemi jyl saıyn óse túsýde. Tek qana Qazaqstan men Qytaı arasyndaǵy temirjolmen júk tasymaldaý ótken jyly 23 mln tonnadan asty. Bıyl bul kórsetkish taǵy 22%-ke ósti. Jyldam ósip kele jatqan júk tasymalynyń áleýetin eskerip, osy salada ınfraqurylymdy damytý jáne vagondar parkin jańartý baǵytynda josparly jumys júrgizý qajet», - dedi Á. Smaıylov Úkimettiń búgingi otyrysynda.
Ol úshin aldaǵy 3 jylda jalpy uzyndyǵy myń shaqyrymnan asatyn jańa temirjol tarmaqtary salynady. Bul – Dostyq-Moıynty, Baqty-Aıagóz, Almaty aınalma temirjol jelisi. Osy aptada Darbaza-Maqtaaral ýchaskesiniń qurylysy bastalady.
Jyljymaly quramdy jańartý maqsatynda 550-den astam lokomotıv, sondaı-aq jolaýshylar jáne júk vagondary satyp alynady. Jalpy uzyndyǵy 5 myń shaqyrym bolatyn qoldanystaǵy magıstraldyq temirjol jelilerin jańǵyrtý júrgizilýde.
«Sonymen qatar, shuǵyl sheshimderdi talap etetin birqatar problema bar. Jyljymaly quram men magıstraldyq jelilerdiń tozý deńgeıi shamamen 60%-ke jetip otyr. Munyń bári poıyzdardyń júrisi men temirjoldyń ótkizý qabiletine kedergi keltirýde. Shekarada júkterdiń rásimdelýine qatysty problemalar bar, bul tranzıt, eksport jáne ımport kólemine áser etedi. Sondyqtan, bıznes úshin qujattardy barynsha jyldam qarap, daıyndap beretin «bir tereze» júıesin qurý qajet. Barlyq qyzmetter jedel ári bir mezette ıaǵnı sınhrondy túrde jumys isteýi tıis», - dedi Premer.
Úkimet basshysy turǵyndar tarapynan «Qazaqstan temir jolynyń» qyzmetine qatysty kóptegen shaǵymdar kelip túskenin aıtty. Poıyzdardyń únemi keshigip kelýi, servıstiń nasharlyǵy, eskirgen vagondar – munyń barlyǵy qalypty jaǵdaıǵa aınalyp barady. Al bıznes vagondardyń ýaqytynda berilmeýin, uzynnan-uzaq kelisý rásimderin aıtyp shaǵymdanýda. Osynyń barlyǵy búkil ekonomıkanyń damýyna keri yqpal etedi.
«Kólik, Qarjy, Aýyl sharýashylyǵy mınıstrlikteri, Shekara qyzmeti, «Samuryq-Qazyna» qory jáne «Qazaqstan temir joly» jyl sońyna deıin júkterdi rásimdeýdi ońaılatý máselesin pysyqtaýy qajet. Qaraý merzimi kem degende 2 ese qysqarýy tıis. Kólik mınıstrligi «Samuryq-Qazyna» qorymen jáne «Qazaqstan temir jolymen» birlesip, jyljymaly quram parkin jańartýdy kúsheıtip, 2029 jylǵa qaraı onyń tozý deńgeıin 40%-ke deıin tómendetýi kerek», - dedi Á. Smaıylov.
Sonymen birge, Premer-Mınıstr Ǵylym jáne joǵary bilim mınıstrligine kólik salasynyń tehnıkalyq mamandyqtary boıynsha qosymsha granttar bólý múmkindigin pysyqtaýdy, Kólik mınıstrligimen birlesip, Kólik jáne logıstıkany damytý ınstıtýtyn qurý máselesin qaraýdy tapsyrdy.