Kólik salasy Qazaqstan ekonomıkasy úshin jańa ósý núktesi bola alady – Álıhan Smaıylov

<p>QR Premer-Mınıstri Álıhan Smaıylov &laquo;24KZ&raquo; telearnasyna bergen suhbatynda Úkimettiń 2023 jyly Qazaqstannyń kólik-tranzıttik áleýetin damytý boıynsha atqarǵan jumysy týraly aıtty, dep habarlaıdy <a href="https://kaz.inform.kz/news/shko-turgini-separatizm-ushn-5-zhilga-sottaldi-34bbb8/Kazinform" target="_blank" rel="noopener">Kazinform</a>.</p>

Úkimet basshysynyń aıtýynsha, logıstıka jaqyn arada el ekonomıkasynyń jańa «ósý núktesine» aınalýy tıis.

«Qazaqstan terrıtorııasy arqyly 13 halyqaralyq dáliz ótedi, onyń 5-i temirjol, 8-i avtomobıl baǵyttary. Bıyl tranzıttik tasymaldardyń jalpy kólemi 21%-ǵa ósip, 30 mln tonnaǵa jetti», — dedi Álıhan Smaıylov.

Sondaı-aq ol elimizde 4 jańa temirjol jelisiniń qurylysy bastalǵanyn eske sala ketti.

«Ótken aptada biz Qytaı baǵytynda jańa temirjol qurylysyn bastadyq. Bul – “Baqty – Aıagóz” jelisi. Ol Qazaqstan men Qytaı arasyndaǵy ótkizý qabiletin 28 mln-nan 48 mln tonnaǵa deıin ulǵaıtýǵa, ońtústiktegi ótkizý toraptaryndaǵy keptelisterdi joıýǵa jáne qosymsha tranzıt kólemin tartýǵa múmkindik beredi», — dedi Premer-Mınıstr.

Ótken aıda «Darbaza – Maqtaaral» jobasy boıynsha jumystar bastaldy. Qazaqstan men Ózbekstan arasyndaǵy jańa temirjoldyń salynýy respýblıkanyń tranzıttik áleýetin keńeıtip, Parsy shyǵanaǵy men Úndistanǵa shyǵýǵa múmkindik beredi.

Budan bólek, Almaty stantsııasyn aınalyp ótetin temirjol jelisiniń qurylysy bastaldy. Joba júzege asyrylǵannan keıin Almaty toraby 40%-ǵa jeńildep, júkterdi jetkizý ýaqyty aıtarlyqtaı qysqarmaq.

Sonymen qatar «Dostyq – Moıynty» ýchaskesinde (800 km astam) ekinshi joldardyń qurylysy jalǵasyp jatyr. Bul joba ótkizý qabiletin 5 esege arttyryp, Qytaı baǵytyndaǵy konteınerlik poıyzdardyń jyldamdyǵyn arttyrady.

«Eger sońǵy 30 jylda elimizde nebári 2500 km temirjol salynsa, aldaǵy 3-4 jylda biz 1300 km astam temirjol salamyz», — dedi Álıhan Smaıylov.

Premer-Mınıstr teńiz kóligin damytý máselesine toqtala kele, Aqtaý jáne Quryq teńiz porttary arqyly tasymaldy arttyrý boıynsha sharalar qabyldanyp jatqanyn atap ótti.

«2025 jylǵa deıin Aqtaýda konteınerlik hab salynady. Quryq portynda astyq termınaly iske qosyldy. Sondaı-aq munda “Sarja” kópfýnktsıonaldy termınalynyń qurylysy júrip jatyr», — dedi ol.

Onyń aıtýynsha, avtokólikpen júk tasymaly da erekshe mańyzǵa ıe. Búginde olar 42 elge 8 tranzıttik avtomobıl dálizi boıynsha júzege asyrylady.

«Avtokólikpen júk tasymalyn odan ári damytý maqsatynda 11 myń km jol qurylysy men kúrdeli jóndeý jumystary júrgizilip jatyr, onyń 7 myń km respýblıkalyq jeli ishinde. Osy jáne basqa da sharalardyń arqasynda biz kólik qyzmetiniń kólemin aıtarlyqtaı arttyrýdy kózdep otyrmyz», — dedi Álıhan Smaıylov.

Sonymen qatar Ázerbaıjan, Grýzııa jáne Túrkııa elderimen Transkaspıı halyqaralyq kólik baǵytyn (THKB) damytý boıynsha birlesken jumys jalǵasýda.

«Biz olarmen birge tıisti jol kartalaryna qol qoıdyq. Maqsat – dáliz boıynsha Kaspıı teńizindegi porttardaǵy, Ázerbaıjan jáne Grýzııadaǵy temirjoldar boıyndaǵy jáne Túrkııadaǵy barlyq “tar” jerlerdi joıý. Qazir bul jumystar belsendi júrgizilip jatyr», — dep túıindedi Premer-Mınıstr.