Kólik mınıstrligi taksılerdiń qalaaralyq tasymalyna shekteý qoıý máselesine qatysty pikir bildirdi

<p>ASTANA. KAZINFORM &ndash; Kólik mınıstrligi taksomotor tasymaly salasyndaǵy jetekshi ınternet-platformalarmen birlesip kórsetiletin qyzmettiń qaýipsizdigi men sapasyn arttyrý boıynsha jumystar júrgizýde, dep habarlaıdy mınıstrliktiń baspasóz qyzmeti.</p>

Baspasóz qyzmetiniń málimetterine qaraǵanda, búgingi kúni osy naryqta qyzmet kórsetýshilerden usynystar qabyldanyp olardy zerdeleý jáne egjeı-tegjeıli talqylaýǵa baılanysty jumystar júrgizilýde.

Barlyq suraqtar men usynystar júıelenip, mindetti túrde qoǵamdyq talqylaýdan ótedi.

Álemdik tájirıbede de, bizdiń memleket aýmaǵynda da halyqty tasymaldaý qaýipsizdigin qamtamasyz etý boıynsha bazalyq talaptar belgilengen, mysaly:

- kólikti tehnıkalyq baqylaýdan ótkizý;

- júrgizýshiniń reıs aldyndaǵy medıtsınalyq tekserýden ótýi;
- júrgizýshiniń jumys jáne demalys rejımin saqtaýy;

- jyldamdyq rejımin saqtaý;

- tasymaldaý salasynda tek sol jaqty rýli bar avtokóliktiń jumys isteýi;

- tasymaldaýshyda saqtandyrýdyń bolýy;

- tasymaldaý salasynda el aýmaǵynda tirkelgen avtomobıldiń ǵana jumys isteýi.

Ókinishke qaraı, joǵaryda atalǵan talaptardy ınternet-platformalar arqyly jumys isteıtin júrgizýshiler jıi saqtamaıdy. Bul jolaýshylardyń qaýipsizdigine tikeleı áser etedi.

Qaıǵyly jaǵdaıǵa soqtyrǵan apattyń kóp bóligi qozǵalys jyldamdyǵy joǵary qalaaralyq trassalarda bolyp jatady. Tıisinshe, basty nazar qalaaralyq jolaýshylar tasymalymen aınalysatyn taksılerge de baǵyttalǵan.

«Aıta ketý kerek, jolaýshylar tasymalynyń qaýipsizdigin jáne jolaýshylarǵa qolaıly jaǵdaı jasaý jumystary odan ári óz jalǵasyn tabady»,-delingen habarlamada.