Kólik mınıstrligi demalys bazalaryndaǵy ushý apparattaryn túgel teksermekshi
Úkimet otyrysynan keıin ótken baspasóz máslıhatynda Kólik mınıstrine Alakóldegi deltaplan apaty týraly suraq qoıyldy.
«Sózsiz, tekserý júrgizemiz. Birinshiden, mundaı tıptegi deltaplandardy da, AN-2 ushaǵyn da. AN-2 ushaqtary týraly aıtsaq, 263 danasy bar. Sonyń tek 94-i ǵana ushýǵa jaramdy, qalǵandary jaramsyz. Sóz joq, zań buzylatyn jaıttar bar. Ushýǵa jaramsyz bolsa da, ushqyshtyń tıisti sertıfıkaty bolmasa da qyzmet kórsetilip jatady. Siz aıtyp otyrǵan deltaplanda da sondaı jaǵdaı», - dedi ol.
Vedomstvo basshysy mundaı faktilerdiń bárine qosymsha tekserý júrgiziletinin aıtady.
«Kez kelgen ushatyn apparatqa bir jyldyq nemese 3 jylǵa deıin ushýǵa jaramdy ekeni týraly sertıfıkat beriledi. Siz aıtyp otyrǵan deltaplan tıpi sertıfıkat almaǵan. Osyǵan baılanysty áýe kemeleri men deltaplan tıptes ushý apparattaryna, sonyń ishinde AN-2 ushaqtaryna da keshendi tekserý júrgizý týraly sheshim qabyldandy», - dedi Marat Qarabaev.