Kólik mınıstrligi bıtým baǵasyn ákimshilik jolmen rettemek

<p>ASTANA. KAZINFORM &ndash; Kólik mınıstrligi bıtýmnyń aınalymyn óz baqylaýyna almady.</p>

5 jeltoqsanǵa deıin ashyq talqylaýǵa shyǵarylǵan zań jobasynda osyndaı tetik usynylǵan.

«Avtomobıl joldary jónindegi ýákiletti memlekettik organ ulttyq operatormen birlesip avtomobıl joldaryn salý, jóndeý jáne kútip ustaý kezeńinde qajetti jol bıtýmynyń kólemin aıqyndaıdy», - dep jazylǵan qujatta.

Sondaı-aq, mınıstrlik ózine baǵynysty basqarmalar men bólimder arqyly jol bıtýmynyń qajettiligine, óndirisi men aınalymyna, tasymaldaý protsesterine, sondaı-aq baǵa dınamıkasyna taldaý jasap otyrýdy kózdeıdi.

«Ókiletti organ avtomobıl joldaryn salý, jóndeý jáne kútip ustaý úshin qajetti jol bıtýmynyń kólemin qalyptastyryp, bólý qaǵıdalaryn bekitedi.

Avtomobıl joldaryn salý, jóndeý jáne kútip ustaý úshin qajetti jol bıtýmynyń kólemin bólýdi júzege asyrady», - delingen zań jobasynda.

Vedomstvo usynǵan túsiniktemege sensek, bul elde bıtýmǵa suranys artqan kezeńde baǵanyń retsiz qubylýyna tosqaýyl bolady.

«Jol salyp, jóndeýmen aınalysatyn kompanııalar bıtým baǵasynyń kúrt ósýine jáne naryqtaǵy deldaldardyń uzaq tizbegine baılanysty jumysyn toqtatýǵa májbúr. Bul másele Reseı Federatsııasynan bıtým shyǵarýǵa tyıym salynǵannan keıin 2014 jyldan beri jalǵasyp keledi. Qysta bıtým jınalady, qurylys maýsymynda baǵalar kóteriledi.

Saldarynan merdigerler shyǵynǵa ushyrap, tipti keıbir jaǵdaılarda jumysyn toqtatýǵa májbúr. Osyǵan baılanysty avtomobıl joldaryn salý, jóndeý jáne kútip ustaý kezeńinde bıtým baǵasyn belgileý tetigin engizý, sondaı-aq avtomobıl joldary jónindegi ýákiletti memlekettik organǵa jol bıtýmynyń kólemin birkelki bólý jónindegi ókilettik berý usynylady. Bul tutastaı alǵanda naryqty turaqtandyrýǵa múmkindik beredi», - dep jazady mınıstrlik mamandary.