Qolym jybyrlap, qaıshymdy izdep otyramyn – mańǵystaýlyq sheber

<p>AQTAÝ. KAZINFORM &ndash; Mańǵystaýda 80 jasqa kelse de, áli de is tigetin sheber keıýana turady. Bolar Ótebaı otbasynda salt-dástúr qatań saqtalyp, eńbekqorlyq dáripteledi. Búginde bul &ndash; aımaqqa belgili, ósip-óngen, ónegeli otbasylardyń biri.</p>

Foto: Aıagóz Іzbasarova

Bolar Ótebaı 1944 jyly Túrikmenstanda dúnıege kelgen. 1987 jyly Mańǵystaýǵa qonys aýdardy. Búginde 5 ul, 3 qyzdan 60-tan astam nemere-shóbere súıip otyr.

Foto: Aıagóz Іzbasarova

Keıýana áli kúnge deıin is tigedi. Aıtýynsha, qolónerge bala kúninen qumar bolǵan. Іsmerlik – ájesinen daryǵan qabilet. Sheber tekemet basyp, alasha toqyp, turmysqa qajetti jabdyqtardyń bárin qoldan jasaıdy. Sondaı-aq, qazaqtyń ulttyq kıimderin tigedi.

- Іs tikpesem qolym jybyrlap, qaıshymdy izdep, máshinimdi izdep, otyra almaımyn. Al tiksem, jaılanamyn. Meniń tikpeıtin zatym joq. Tańdamaımyn. Oıýly ma, tegis tigis pe, báribir. Kıim tigý kerek pe, kórpe-tósek pe, bárin tige beremin. Dastarhan, súlgiler, tósenishterdi tigemin. Balalarym aýyryp qalasyń dep ursady. Biraq shydaı almaımyn, - deıdi sheber.

Foto: Aıagóz Іzbasarova

Bolar Ótebaı Oımashy aýylynda 2 ul-kelinimen birge turady. Otbasynda 15 shaqty adam bar. Bári tatý-tátti. Keıýananyń úlken kelini ıÝlana men kishi kelini Nesiphan qolónerdi tolyq meńgergen. Endi qyzdaryn baýlyp júr.

- Úlken áýletke eń kishi kelin bolyp tústim. Úırenisýime 4 jyl ketti. Osy ýaqytta enem maǵan bárin úıretti. Sálem salýdan bastap, sháı quıý, qonaq kútý, bárin meńgerdim. Enem eńbekqor adam. Іs tikkende qasynda otyryp, oıýyn oıyp berip, meniń de qyzyǵýshylyǵym oıandy. Ózimniń kóılekterimdi, kerek-jaraqtarymdy tigip alamyn. Qyzym 13 jasqa tolǵanda, oǵan da úırete bastadym. Qyzym osy ónerge qyzyǵyp, dızaınerlik mamandyǵyn oqyp jatyr, - deıdi Nesiphan Baǵlasheva.

Foto: Aıagóz Іzbasarova

Aıta keteıik, 15 mamyr - Halyqaralyq otbasy kúni. 1993 jyldan bastap, BUU Bas Assambleıasynyń qararyna sáıkes jyl saıyn atalyp ótedi.