Kóliktik baqylaý salasyndaǵy jetilmegen aqparattyq júıeden 10 mlrd teńge shyǵyn keledi

NUR-SULTAN. QazAqparat – Kóliktik baqylaý salasynyń aqparattyq júıeleri jetilmegen. Osynyń saldarynan jyl saıyn bıýdjetke aıyppuldar men ózge de tólemder túrinde túsetin qarajat kólemi 10 mlrd teńgege qysqarýy múmkin. Bul týraly kóliktik baqylaý salasyna taldaý júrgizgen Sybaılas jemqorlyqqa qarsy is-qımyl agenttiginiń ókilderi málim etti, dep habarlaıdy QazAqparat tilshisi.

Agenttik dereginshe, Indýstrııa mınıstrligine qarasty komıtet kólikti baqylaý salasyn sapaly tsıfrlyq júıege kóshirmegen. Osyǵan baılanysty kólikterdiń 90 paıyzy memlekettik retteýden tys qalady.

«Máselen, 5 top 2 myń sheteldik ruqsat blankilerin aıalaıaqtyq jolmen alǵan. Inspektsııaǵa olardyń tek 4 paıyzy ǵana qaıtaryldy. Atalǵan toptar blankilerdi qaıta satqan bolýy múmkin. Sonymen qatar, ótken jyly 435 myń jalǵan dıagnostıkalyq karta bergen 54 operator anyqtaldy. Bul - avtomattandyrý men aqparattyq júıelerdiń jetilmegendigine baılanysty bolyp otyr», - dep málim etti agenttiktiń baspasóz qyzmetinen.

Munymen qosa, quzyrly organ jyl saıyn «Qazaqstan sý joldary» qazynalyq kásiporynyna bóletin qarajattyń tıisti esebi joq ekenin aıtty.

«Tasymaldaýshylardy aıqyndaý jónindegi konkýrsqa qatysý ótinishteri tek qaǵaz kúıinde qabyldanady. Al, olarǵa beriletin sýbsıdııalar boljamdy kórsetkishter negizinde tólenedi. Nátıjesinde tasymaldaýshylar óz shyǵyndaryn kóp dep kórsetedi de, boljamdy qomaqty somany alady. Keme qatynasy qaýipsizdigin qamtamasyz etý maqsatynda «Qazaqstan sý joldary» RMQK jyl saıyn 9 mlrd teńge bólinedi. Bul rette osy qarajat qajettiliginiń tıisti esebi joq», - delingen quzyrly organnyń baspasóz qyzmeti jarııalaǵan habarlamada.

Qosa ketsek, bul ýaqytqa deıin Almatyda qoǵamdyq kólikti júrgizip júrgen qujatsyz sheteldik azamat anyqtalǵanyn habarlaǵan bolatynbyz.