Kólikti saqtandyrý salasynda bıyl qandaı ózgerister bolady

NUR-SULTAN. QazAqparat - Halyqaralyq praktıkada saqtandyrý jaǵdaıyn retteýdiń jeńildetilgen tártibi keń taralǵan. Ol Eýrohattama retinde barshaǵa belgili. Qazirgi kezde Eýrohattama Eýropanyń kóptegen elderinde jáne TMD-nyń Reseı, Belarýs, Ýkraına, Armenııa, Ózbekstan sııaqty birqatar elderinde usynylǵan, dep habarlaıdy QazAqparat.

Qarjy naryǵyn retteý jáne damytý agenttigi taratqan málimetke sensek,Eýrohattamaǵa sáıkes jol-kólik oqıǵasy (JKO) týraly qujattar jeńildetilgen túrde resimdeledi, ondaı resimdeý jol polıtsııasynyń qyzmetkerleri qatyspaı jáne sot sheshimi shyǵarylmaı júzege asyrylady.

Búgingi kúni joldarda zardap shekken adamdarsyz jáne JKO qatysýshylary bolyp tabylmaıtyn tulǵalardyń múlkine zııan keltirmesten kóptegen eleýsiz JKO oryn alýda.

Saqtandyrý tólemin alý úshin JKO qatysýshylary jol polıtsııasy qyzmetkerleriniń kelýin kútedi, hattamalardy toltyrady jáne sot sheshimin kútedi. Kóbinese bul protsess eki aıǵa jýyq ýaqytty alady.

Saqtandyrý naryǵyn damytý jónindegi zań jobasyn qaraý barysynda Májilis depýtattary Eýrohattama qaǵıdaty boıynsha usaq JKO kezinde saqtandyrý tólemin alý tártibin jeńildetý týraly máseleni kóterdi.

Májilis depýtattary QR Qarjy naryǵyn retteý jáne damytý agenttigimen jáne basqa da múddeli memlekettik organdarmen birlesip, Qazaqstanda Eýrohattamany engizý úshin qajetti zańnamalyq normalardy daıyndaý jumystaryn júrgizdi.

Saqtandyrý jaǵdaıyn retteýdiń qoldanystaǵy tártibimen qatar:

- JKO eki kólik quralynyń soqtyǵysýy nátıjesinde oryn alǵan;

- JKO nátıjesinde JKO qatysýshylarynyń kólik quraldaryna ǵana zııan keltirilgen (ómiri men densaýlyǵyna zııan keltirilgen jábirlenýshiler bolmaǵan kezde úshinshi tulǵalardyń múlki zardap shekpegen);

- JKO qatysýshylarynda saqtandyrý polısi bolǵan;

- JKO-ǵa qatysýshylarda JKO-ǵa kinálini anyqtaý máselesinde kelispeýshilik bolmaǵan;

- JKO-ny resimdeý sot sheshiminsiz jáne ishki ister organdary qyzmetkerleriniń qatysýynsyz júzege asyrylǵan;

- saqtandyrý tólemi bir saqtandyrý jaǵdaıy boıynsha 100 AEK sheginde júzege asyrylǵan jaǵdaılarda Eýrohattamany qoldaný boljanady.

Osylaısha, bul rásim JKO-ny resimdeý jáne zardap shekken adamdardyń saqtandyrý tólemin alý merzimin aıtarlyqtaı qysqartady.

JKO-ny resimdeý JKO-nyń qatysýshylary qandaı saqtandyrý kompanııasynda saqtandyrylǵanyna qaramastan Biryńǵaı saqtandyrý derekqorynyń mobıldik qosymshasyn paıdalaný arqyly júzege asyrylatyn bolady.

Eýrohattamany engizý saqtandyrý tólemderin alý rásimin jeńildetýge, biryńǵaı mobıldik qosymshany paıdalana otyryp búkil protsesti tsıfrlandyrýdy qamtamasyz etýge, JKO-ny resimdeý kezinde joldarda keptelisterdiń paıda bolý sanyn azaıtýǵa múmkindik beredi.