Kólikti nómirsiz basqarǵandarǵa jaýapkershilik kúsheıtiledi - Senat

NUR-SULTAN. QazAqparat – Búgin Senattyń jalpy otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Parlament depýtattary bastamashylyq jasaǵan bul qujat QR Prezıdentiniń tapsyrmalaryn iske asyrý, baılanys qyzmeti salasynda tutynýshylardyń quqyqtaryn tıimdi qorǵaýdy qalyptastyrý maqsatynda ázirlendi.

Zań jobasy aıasynda telefon, uıaly baılanys jáne ınternet qyzmetterin kórsetý qaǵıdalaryn buzǵany úshin baılanys operatorlaryna qatysty ákimshilik jaýaptylyq eskerilgen.

Sonymen qatar baılanys operatorlary kórsetetin qyzmetterdiń sapasyn arttyrý, ınternet sapasynyń belgilengen talaptarǵa sáıkes kelmegeni úshin aıyppul mólsherin ulǵaıtý qarastyrylǵan.

Zań jobasy aıasynda jumys barysynda bıýdjettik baǵdarlamalardyń birinshi basshysynyń qaryz shartynda belgilengen merzimde memlekettik syrtqy qaryz qarajatyn ıgermegeni úshin ákimshilik jaýaptylyǵyn belgileýge qatysty túzetýler engizildi.

Alkogol óniminiń aınalymy jáne etıl spırtin óndirý boıynsha keıbir termınder naqtylandy, sondaı-aq temeki ónimderin sáıkestendirý quraldarymen tańbalaý erejelerin saqtaý boıynsha talaptar belgilendi.

Budan basqa, qarý-jaraq aınalymyna qoıylatyn talaptardy qatańdatý eskerilgen.

Memlekettik tirkeý nómiri belgilerinsiz nemese olardy paıdalanýǵa tyıym salynǵannan keıin kólik quraldaryn qaıta basqarǵany úshin jaýaptylyqty belgileý boıynsha túzetýler engiziledi.

Quqyq qorǵaý organdary qyzmetkerleriniń zańdy talaptaryn oryndamaǵany úshin jaýapshylyqty qatańdatý bóliginde túzetýler kózdelgen.