Kóliktegi polıtsııa tártipsizdikke qatysty 72 qylmystyq isti tergep jatyr

NUR-SULTAN. QazAqparat – Qańtardaǵy tártipsizdikke qatysty kóliktegi polıtsııa 72 qylmystyq isti tergep jatyr. Bul týraly Іshki ister mınıstrligi Kóliktegi polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

Búgin Kóliktegi polıtsııa departamenti bastyǵynyń orynbasary Saryqul Jolanov 2022 jylǵy qańtar aıynda kólik nysandarynda bolǵan jappaı tártipsizdikke qatysty qylmystyq isterdiń tergelý barysy jaıynda brıfıng ótkizdi.

Onyń aıtýynsha, departament pen onyń aýmaqtyq bólimsheleri bıylǵy 3-31 qańtar aralyǵynda jappaı tártipsizdik boıynsha 72 qylmystyq is tirkedi. Bul turǵyda urlyq pen tonaý faktileri tekserilip jatyr.

Qylmystar boıynsha ýaqytsha ustaý oqshaýlaǵyshyna 14 kúdikti qamaldy. 31 qańtardaǵy jaǵdaı boıynsha kólik nysandaryndaǵy keltirilgen shyǵynnyń aldyn ala somasy 530 792 668,8 teńgeni qurady.

Osy oraıda kólik polıtsııasy qyzmetkerleri kúdiktilerden 24 587 874 teńge somasyndaǵy urlanǵan múlikti tárkiledi. Sonyń arasynda 3 avtokólik, 5 uıaly telefon, 2 299 825 teńge samasynda aqsha jáne quny 635 000 teńge bolatyn kıim bar.

«Narazylyq aktsııalary kezeńinde qylmyskerler memlekettik mańyzdaǵy eki nysanǵa zaqym keltirdi. Onyń qatarynda Almatynyń halyqaralyq áýejaıy men Almaty qalasy áýejaıyndaǵy polıtsııanyń jelilik bólimi bar. Sonymen qatar, áýejaı ǵımaratynyń ishinde ornalasqan saýda nysandaryna da shyǵyn keltirildi», - dedi Saryqul Jolanov.

Onyń aıtýynsha, qazirgi ýaqytta polıtsııa departamenti qyzmet kórsetetin aýmaqta jedel izdestirý is-sharalary jalǵasýda.