Kóliktegi baılanǵan er adam – astana polıtsııasy vıdeoǵa túsinik berdi

NUR-SULTAN. QazAqparat – Elordada kóliktiń júk salǵyshyna qol-aıaǵy baılanǵan er adamdy salyp, kóshe aralaǵan prankerler jazalandy, dep habarlaıdy QazAqparat tilshisi.

Kóliktegi baılanǵan er adam – astana polıtsııasy vıdeoǵa túsinik berdi

«21 sáýir kúni saǵat 19:28 kezinde «102» pýltine Seıfýllın-Ýálıhanov kósheleri qıylysynda, ıaǵnı «Aımaqtaý» saýda úıiniń mańyndaǵy avtokóliktiń júk salǵyshynda qol-aıaǵy baılanǵan jas jigit jatqany týraly habar kelip tústi. Bul jerge jedel túrde polıtsııa jasaǵy jiberildi. Sol aýmaqty sholý kezinde oqıǵaǵa qatysy bar adamdar ustaldy. Olar 19-22 jastaǵy jastar ekeni anyqtaldy», - delingen qalalyq Polıtsııa departamenti málimetinde.

Oqıǵanyń mán-jaıyn anyqtaý barysynda qoǵamdyq tártipti buzǵandar áleýmettik eksperıment júrgizgeni belgili boldy.

«Baıqońyr» aýdany polıtsııa basqarmasynyń qyzmetkerleri olardy usaq buzaqylyq boıynsha ákimshilik jaýapkershilikke tartyp, materıaldardy ákimshilik sotqa joldady.

Eske salsaq, jaqynda Almatyda «qyz alyp qashyp», prank jasaǵandar jazalanǵan bolatyn. 18 jastaǵy boıjetken halyqtan keshirim surady.